Yiwen umɣar isa si warrac d teqcict ibɣa ad iẓer anwa i iḥercen. yiwen wass, kkren-d warrac ssbaḥ zik, swan n lqahwa, ffɣen ɣer lexla. Yiwen iruḥ ad yeks, wayeḍ iṛuḥ ad ikrez, ma d taqcict-nni teqqim deg uxxam. Tessuli sin n yiẓedwan, tseww u texdem ccɣel n uxxam. Tameddit mi d-mlalen deg uxxam isteqsa-ten baba-tsen d acu xedmen ass-nni. Inṭeq-d yiwen seg warrac-nni yenna-as: ass-agi wwiɣ lmal ɣer yiwen umekkan iččur d leḥcic, ččan armi ṛwan, rniɣ ḥucceɣ-asen-d leḥcic. Inṭaq wayeḍ yenna: ass-agi, wellah a baba, xas yeqqur wakal, ulac aman, kerzeɣ urti llah ibarek d ameqqran. Inna-as i yelli-s: i kemm a yelli d acu txedmeḍ? Tenna-as yelli-s: nekk a baba ulac acu i xedmeɣ, ẓdiɣ kan sin n yilawen dayagi. Inna-yas: ṛuḥ a yelli ad am-t-id-ǧǧeɣ akka si tmeṭṭut ɣer tayeḍ, anida tella tmeṭṭut ur yettali cɣel. Teffeɣ teqcict-nni ɣer tala, teḥka i tiyaḍ ayen i s-yenna baba-s. Nnant-as: d ddewessu a tinnat, ta ad tt-id-tettaǧǧa i tayeḍ, cɣel-is ur yettali. Tuɣal-d s axxam, teffeɣ ɣer tmazirt teqqim din tettru tettru… Tekkes-d iffer n texsayt tebda la teṭṭebbiq deg ufus-is u teqqar: wellah ad xedmeɣ kra swayes meqqar ara yi-d-ttadren medden. Ssbaḥ zik tekker, tena aẓeṭṭa. Mi d-yekker baba-s iwhem deg-s yenna-as : d acu ara txeddmeḍ a yelli ssbaḥ zik? Tenna-as: a ẓeṭṭeɣ abernus a baba. Tẓeṭṭ, tẓeṭṭ, nettat tettwali ɣer yifer-nni n texsayt. Ass-nni mi yekfa ubernus, tella lǧanaza di taddart-nni. Akken ikker baba-s ad iffeɣ ad ieẓẓer deg uxxam lǧanaza, tenna-as yelli-s suffeɣ abernus-agi, a-t-an ifukk. Iffeɣ urgaz ad ieẓẓer, ilsa abernus-nni. Icḍaḍen-is annect-ilaten, iḥar amek ara asen-ixdem. Yewweḍ, iqqim. A win d-yeqqimen ɣef tama-s ad as-yini jebden si tecḍaḍt-a ad tɣummeḍ. Akken alammi dlen meyya. Dlen, ɣummen maca yiwen ur as-yenni anta i t-yeẓḍan abernus-a. Akka, ula tura ccɣel n tmeṭṭut, yiwen ur t-id-ittader.
Ramdane Lasheb