I lmend n usfugel n umulli amezwaru n usenṣeb n tmazuit i d-yellan aseggas iɛeddan deg wass n 6 deg furar, taneɣlaft n TIC tessuffeɣ-d yiwen n uɣdem s tutlayt n tmaziɣt. Asenɛet n uɣdem-agi, yella-d deg uxxam n Usqamu Unnig n timmuzɣa ddurt -ɛeddan anda teḥder tneɣlaft n TIC akked unemhal amatu n Algérie poste. Deg wawal-is, yenna Mass Assad : ‘’aya yekcem deg usnerni n tmaziɣt deg unnar i wakken ad d-nesbin asenṣeb-is s ttbut. D tawwurt-nniḍen i as-ifetḥen i tutlayt n tmaziɣt i yebdan tettreṣṣi deg tmetti seg wass ɣer wass. Aɣdem-a, d ccira n tmagit n tmurt ara yeffɣen ɣer berra i wakken ad yettwassen yidles d tutlayt’’. Ma ɣef tkadimit n tmaziɣt i yettwarǧan aṭas-aya, yenna- : ‘’ ur d-tettas ara tkadimt n tmaziɣt i wakken ad tesfeḍ Asqamu Unnig n Timmuzɣa, ad d-tas d akemmel i leqdic n usqamu-a. ad teṭṭef aḥric ussnan d tfukkest. HCA, ad yeqqim deg yiswi-ines. Ad yesnerni tamaziɣt am wakken ad yili d assaɣ gar tneɣlafin’’. Ma ɣef yisekkilen s wacu ara taru tmaziɣt, mazal ur tt-gzim ara di rray. Xas ulamma Asqamu Unnig n Timmuzɣa, yesmenyif isekkilen ilaṭiniyen imi amur ameqqran yis-sen i ttwaxedmen inadiyen, meɛna yenna-d ilaq ad nerr ddehn ɣer tilawt, ɣef wakken i d-yenna. Seg tama-s, taneɣlaft n TIC tenna-d :’’tikti tekka-d seg Algérie poste i d-yerra i tiɣri n uselway n tegduda i yebɣal ad as-yuɣal wazal i tmaziɣt, imi yellan d tarkizt n tmagit taɣelnawt’’.
D.M