Accueil Tamazight Amtawa n Evian 19 meɣres 1962

Tagrawla tazzayrit (1954-1962) : Amtawa n Evian 19 meɣres 1962

703
- PUBLICITÉ -

Ass n 18 deg meɣres 1962 i d-yella umtawa gar lḥukuma n Fransa akked lḥukuma n leɛḍil n tegduda tazzayrit, deg temdint n Evian-les-Bains deg tmurt n Fransa.Ṭrad, i idummen sebɛa n yiseggasen d uzgen, anda mmuten ugar n umelyun d uzgen n yimeɣras izzayriyen.

- PUBLICITÉ -

Ihi, seg wass-nni i yeḥbes ṛsas u yebda yettban-d uzarug n tmurt n Lezzayer, xas ulamma tella tama tamṭerfit timselleḥt OAS i yellan mgal amtawa-agi. Tuddsa-agi, dɣa, i yenɣan Mouloud Mɛemmri d 5 n yimeddul-is deg Lezzayer tamaneɣt ass n 15 deg meɣres 1962. Yebda umeslay ɣef umtawa-agi seg 8 armi d 18 deg meɣres 1962 anda i d-yella umtafaq gar tama n Lezzayer akked tama n Fransa. Amtawa-agi yesstenya-t Krim Belkacem, seg tama n Lezzayer u Louis Joxe, aneɣlaf n Fransa. Aḍris n umtawa, yeqqar-d ad yeḥbes ṭrad seg 19 deg meɣres 1962, aserreḥ i yimeḥbas akken ma llan, ad d-yili afraniman gar tlata n wagguren ɣer setta i d-iteddun, ad yili wahil n tuffɣa n lɛesker n Fransa d wayen-nniḍen. D Krim Belkacem i yellan ɣef uqerru n tarbaɛt n yizzayriyen i iḥeḍren deg umtawa-agi n Evians. Llan yid-s : Taib Boulahrouf, Saâd Dahlab, Mohamed Seddik Benyahia, Benmostefa Benaouda, Redha Malek, Lakhdar Bentobal, M’Hamed Yazid akked Seghir Mostefai. Deg umtawa-agi, tḥettem tama tazzayrit ɣef lḥukuma n Fransa akken ad teqbel amur ameqqran n yiswiyen i d-yellan deg ulɣu-nni n umenzu n unbir 1954. Deg umenzu n yulyu 1962, yella ufraniman ɣef uzarug n Lezzayer. Asteqsi yella-d deg ufran akka ‘’Ma tebɣam ad tuɣal Lezzayer d tamurt s timunent-is u ad temɛawan akked Fransa ɛlaḥsab n wayen yellan deg umtawa-nni n Evians ?’’. Ass-nni, 91,23% (5.975.581) n Yizzayriyen, rran-d s (Ih) i tmunent n Lezzayer, gar 6.549.736 i iruḥen ɣer yisendaq n tefranin. Azal n 0,25% i d-yennan (Ala), meḥsub 16.534 n yimdanen i yellan mgal timunent n Lezzayer. Ma d 8.12% (532.056) n yimdanen, ur ruḥen ara ɣer tefranin-agi. Ass n 3 deg yulyu 1962, yenna-d uselway n Fransa Charles de Gaulle agemmuḍ n ufraniman-agi u testeɛref Fransa s timunent n Lezzayer, u tberreḥ-d yis-s s wudem unṣib. Ass n 5 deg yulyu 1962, tuɣal Lezzayer d aɣlan am nettat am tiyaḍ, tewwi timunent-is.

Hocine Moula

- PUBLICITÉ -