Deg ddurt-agi yezrin i d-yeffeɣ wammud amaynut n umedyaz aqbayli Mass Malek Houd iwumi ifka azwel “Tilelli ur nelli” i d-yeffɣen ɣef ddemma n umeskar ɣer tezrigin «Naim» deg Uftis deg lwilaya n Bgayet. Iger-d deg-s ddeq-s n yisental yecban : Tarewla (harraga), tanegmit ɣef tmagit tamaziɣt ur nuwiḍ ɣer lebɣi-s ar ass-a, amezruy s wudem n tidet mačči akken i tebɣan kra, iɣeblan n tmetti, mačči yiwen i yellan, tamḥeqranit i d-isemɣin acciwen tcekkeḍ deg wid ur nuklal, uguren i d-ttmmagaren yilmeẓyen almi deggren iman-nsen mebla aḥezzeb ɣer lemwaji n yilel ur nettqili …atg. Llan deg-s azal n 47 n yisefra s teqbaylit. Ma d tazwart ixdem-as-tt Mass Djamal Arezki, d yiwen n umeɣnas aqdim n tmaziɣt (yettekki deg Umussu adelsan amaziɣ), diɣen d amaswaḍ n tefransist deg Ugezdu n Tubiret.
A .A