Ass n lǧemɛa yezrin, taɣlift n Usegmi aɣelnaw teldi tiɣerɣert n uttekki deg temsizzelt yerzan iselmaden n yiswiren i tlata: amenzu, alemmas d usnawi. Ɣas akka, mazal ur d-iban ara s wudem unṣib umḍan n yimekwan ara d-iṣaḥen yal tawilayt, maca ṭṭmeɛ d win izedɣen acḥal d ilemẓi d tlemẓit yettraǧun s ccuq tagnit-a ara asen-d-yeldin tiwwura s axeddim. Aṭas i yurǧan dakken timsizzelt ad d-tili deg taggara n wayyur-a ideg nella, maca taneɣlaft n Usegmi Massa Benghebrit twekked-d akka deg temlilit-is taneggarut akked yimaswaḍen belli timsizzelt ad d-tili ass n 29 deg yunyu i d-iteddun. Aseɣzef-a deg usiher ur d-yelli ara mebla leḥsab imi akka tura srabes n CNR sɣerbilen deg yikaramen n wid yebɣan ad awin tastaɣt. Ahat d ayen ara d-ibeggnen s tidet ayen ara teḥwiǧ yal tamnaḍt n yimekwan. Tubiret, d tin yettrajun dɣa taggara n wuddun (recensement) n wid ara yeffɣen iwakken ad d-banen yimekwan, iwakken ur d-tɣelli ara deg leɣlaḍ n useggas yezrin anda aswir asnawi ur d-telli fell-as temsizzelt. Kra n tangawin deg uswir alemmas ur teɛni ara temsizzelt qqiment deg beddu n useggas-a aɣurbiz mebla iselmaden almi i d-usan seg twilayin nniḍen. Tangawin-a, yecban tutlayt taglizzit, addal, d tussna tamagant ur ttuɣalent ara aseggas-a deg rrif, imi ḥwaǧent iselmaden. Ma d tutlayt tafrensist mazal tuɣal d aɛewwiq imi mačči aṭas I yettruḥun ɣur-s deg tesdawit, d ayen I d-yettaǧǧan imukan d ilmawen deg yiɣerbazen. Deg waggur n yennayer yezrin, mi akken yewweḍ lawan ad ɛeddin yikaramen n yiselmaden imaynuten ama d wid irebḥen deg temsizzelt neɣ wid ixeddmen s leɛqed ɣer yimsenqed n tedrimt yeḍra-d akka kra n leɛweq ɣef kra n wid ixeddmen s yiguta deg tutlayt tafrensist, imi ineggura-a ur ksiben ara turagt deg tanga-a. Ad d-nesmekti dakken timsizzelt-a ad d-tili deg tazwara s wudem n tira, iwakken wid i d-yufraren ad kemmlen s timawit. Igemmaḍ ad ten-walin s ttawil n l’Internet mebla ma rzan am zik alamma d takadimit. Widak ara d-yifriren deg temsizzelt, taɣlift n Usegmi ad asen-telli tiwwura i usileɣ deg waggur n yulyu iwakken xerṣum ad ẓren amek ara qablen inelmaden, acu i asen-iwulmen ad t-xedmen daxel n tneɣrit d kra n temsirin yerzan asader (la profession).
M. Smail