D tumert i yettekcamen deg wulawen n Yiqbayliyen, i iḥemmlen tutlayt-nsen, ladɣa tira-s d tsekla-s, yal mi ara d-yennerni udlis d amaynut. Aṭas n yimyura d yimedyazen i d-yessufuɣen ayen ttarun akken ad t-ɣren wiyaḍ. Dɣa, taggara-a, d tamedyazt tilemẓit Massa Katiya Tuwwat i d-yesferḥen ayetma-s Izwawen s tuffɣa n wammud-is n tmedyazt amenzu ɣur Teẓrigin Achab, iwumi tefka azwel: « Ijeɣlalen n tudert ». Tameskart, yelli-s n taddart n Buzeggan, mm 28 n yiseggasen, tesres-d deg tewriqin timellalin 27 n yisefra iɣezfanen, d 6 n tseddarin n drus n yifyar, neɣ isefra iwezlanen amek i asen-tsemma. Mi ara yeṭṭef yiwen ammud-nni, ad t-yeldi kan ad yaf isekkilen n temɛemrit ttraǧun ad ten-tettbeɛ tmuɣli alamma fukken. Deffir tezwart tummidt i as-d-tura temnadit Massa Nacera Abrous, d wawal i d-tenna tmedyazt i yimeɣriyen d tmeɣriyin, ad d-taweḍ nnuba n yisefra i yebnan ɣef wazal d lmeɛna n wawal. Mačči d yiwen neɣ d sin n yisental iɣef tesselḥa Katiya Tuwwat imru akken ad ijerred tiktiwin s tsusmi d war akukru. Ɣas ma win i yegren tamawt i tkemmict n yisefra i d-tefren, ad yaf belli tesmedyiz s waṭas ɣef tayri, maca llant temsal d tlufa-nniḍen i d-tebder. Imi tessefra daɣen ɣef tyemmat, tameṭṭut, tudert…, atg. Deg yal asefru, ad yekcem yimeɣri deg tugniwin n umeslay i tesseqdac tmedyazt deg lebni n yisefra-s. Tenna deg yiwen n usefru:
Ma ɣaḍeɣ-ken mi mmuteɣ
Mmektit-d mmuteɣ yakan
Mmuteɣ asmi akken i d-luleɣ
Qumren-iyi-d imukan
Yal ass deg-sen ttfateɣ
Ttsifeɣ wissen d lukan
Xas tettrum fell-i ḍelqeɣ
Nekk ttruɣ ɣef wid i d-yeggran
Nekk d lmut i s i ferḥeɣ
Kerheɣ tudert am qeḍran.
Aṭas n tmussni i yellan daxel tduli n wammud « Ijeɣlalen n tudert!” Win iḥemmlen awanes n tira, ad d-yemlil deg-s asegzi n tlufa ur fhimen kra n medden. Ad as-nini i Katiya ayyuz fell-am! Nessaram ammud-ines ad yili d talalit ara d-yeglun s yidlisen-nniḍen i temkarḍit taqbaylit. Afud igerrzen i yimyura!
Kaisa Khalifi