Ussan-agi ineggura, Tger-d tcennayt taqbaylit Louiza tiɣri i Leqbayel i wakken ad tt-ɛiwnen s tedrimt imi i d-yeɣli-d fell-as waṭṭan. Aṭas n ttawilat i as-ilaqen, ladɣa lmesruf, netta ur tezmir ara ad t-tqabel. Ɣef wakken i d-tenna tiɣri-agi ur tettuneḥsab ara d tuttra, maca tewwed-as tfidi s iɣes. “Xas imejjayen deg tmurt n Lezzayer ẓewwren, maca ulac dwawi i iwulmen’’, i twala tcennayt Louiza. Ɣef waya, truḥ ɣer tmurt n Fransa, s axxam n mmi-s i wakken ad tdawi. Acu kan, laqen-as setta neɣ sebɛa les scanners d 660 n tsegnatin. Aya-agi yeḍḥa-d dayen ɣlayen, ur tezmir ara ad txelles akk anect-a. Tenna-d belli snen-tt Leqbayel tcennu seg useggas n 1978 ar ass-a n wussan. Mazal ur teqḍiɛ ara layas. Tebɣa ad teḥlu akken ad tkemmel ccna. Tecna ɣef tmurt, ɣef tmeṭṭut , ɣef lḥerma. Tḥemmel ifennan imeqqranen, yecban slimane Azem , Ait menguellet, Matoub Lounes d wiyad-nniden. Tenna-d belli tsetḥa imi i d -tessutet deg Leqbayel akken ad tt-ɛiwnen, meɛna d lehlak-agi d amcum i d-yeɣlin fell-as. Ɣef wakka i teḍleb ad tt-iɛiwen win i izemren s cwit mačč alamma s waṭas. « Ya yiwen ad i yi-d-yefk ayen iwumi yezmer ma yehwa-as 100DA, awi-d kan ad ḥluɣ. Kra n win i yi-d-yessutren zik, cennugh-as baṭel imi mačči d adrim i d ssaḥ. Cennugh s nnif d lḥerma, i leqbayel i teqbaylit », i tessuter tdeg Leqbayel tcennayt Louiza. Am wakken, diɣ, tessutur deg tdukkliwin ad tt-ɛiwnen, yerna teqqar-asen ma yella teḥla, ayen ara d-yegrin n yidrimen, ad tent-tefk i tdukkliwin-agi. Tekfa tiɣri-s s wawal-a « Imi i ken-ḥemmleɣ, tḥemmlem-iyi i d-ssutureɣ deg-wen afus n tallelt, akken ad jjiɣ ».
Z. B. Y.