Accueil Tamazight Gar lmesruf n Remdan d leɣla n llebsa

Lɛid tameẓyant : Gar lmesruf n Remdan d leɣla n llebsa

867
- PUBLICITÉ -

Ugar n umelyar n yinselmen seg umaḍal i iqublen lɛid tameẓyant ddurt-a. Limer d lebɣi, ass n lɛid, yettuneḥsab d ass n tmeɣra, d ass n tegmat, d ass n smaḥ akked talwit.

- PUBLICITÉ -

Anda yebɣu yili uɛeggal n twacult, ad d-yerzu s imawlan-is i wakken ad ɛeggden akken lwaḥid. Ɣer Leqbayel, zik-nni, d taswiɛt anda ferrun uguren i d-ttmagaren ɣef teɣzi n useggas. Xas mɣunzan iɛeggalen gar-asen, maca ass-nni n lɛid, ad mlaɛin, ad msamaḥen : ur ttḥiwwisen ara anwa i iḍelmen wayeḍ, ad walin kan amek ara zḍen tagmat-nsen. Ula gar twaculin, yetti-d waya. Ass-a n wussan, kra din iruḥ, yečča-t zzman. Mačči kan d tagmat deg wayeg i tent-uɣen, ula d leɛwayed, bɣan ad ten-beddlen imi la d-ttawin kra n tikerkas anda-nniḍen. Ttagin ad neṭṭqen ula ɣer win ur ten-necbi. Acḥal n twaculin i yuɣ iceqqiqen s ssebba n lefɛayel-agi. Limer yal yiwen ad yeg aktazal i yiman-is, ad iwali d acu yexdem n wayen yelhan ɣef teɣzi n waggur-agi n Remḍan, ahat ad as-d-iban ma yella dɣa d aggur n rreḥma akked talwit neɣ d aggur n wurrif akked cwal ? Ma yella d aggur n umɛiwen akked useddeq neɣ d aggur n tkerkas akked txidas ? Acḥal n terwiḥin i iruḥen deg waggur-agi n Remḍan, ama seg twaɣiyin n yiberdan, ama seg umennuɣ gar yimdanen. Aya seg tama, seg tama-nniḍen, ad naf ula d taxriṭ n twacult tezwi. Ɣef wakken i d-yenna Mass Zaki Hariz, aselway n Tiddukla tazzayrit n yimsidiren (FAZ), tserref twacult gar 80 000 idinaren ar 100 000 idinaren deg waggur-agi n Remḍan. Ladɣa deg llebsa n warrac imi ɣef wakken iwali, tewwi-d ɣef twacult ad tserref gar 30 000 idinaren alamma d 35 000 idinaren i wakken ad taɣ iceṭṭḍen i dderya-as. Aya, ma tella twacult-a tesɛa kan tlata n yiɛeggalen. Wameg tadrimt tettzad ɣef wakken ttzidin iɛeggalen. Zyada ɣef tlaba-agi, laqen-as, diɣ, i warrac-agi imeẓyanen ilellucen s wayes ara leɛben, axater ma ulac-iten mačči d lɛid ɣur-sen. Syin akkin, wulmen warrazen i wid meqqren, yal aɛeggal s tɣawsa-s. Ɣef wakken nwala deg ssuq, 80% n llebsa yettnuzun deg tmurt, tekka-d seg tmura n Cinwa, n Ṭṭurk, n Lhend akked Sebbunyul u yerna ɣlayet mačči d izli. Tawaɣit deg yiceṭṭiḍen-a, ttwxedmen s lexyuḍ n istitik. Xas akka, mazal lmesruf ur yekfi ara, laqent tẓidanin i wass-nni n lɛid. Yettili-d uheggi n lgaṭu kra n wussan uqbel lɛid. Aṭas n leṣnaf n tẓidanin i d-tewwi ɣef twacult ad d-theggi i yiɛeggalen neɣ i trezzaf. Rnu ɣer wanect-a, imensi n wass n lɛid. Akken yebɣu yili lḥal, lɛid tameggazt.

Hocine Moula

- PUBLICITÉ -