Deg tegnatin igerrzen i tekfa teẓrigt tis seddis n tfaska n uqennuc ansayan deg tɣiwant n Ayt Smaɛel, i ibeɛden s wazal n 70 n yikilumiṭren seg waɣir n Bgayet. Seg teldayt tunsibt i d-yellan ass n ssebt mettwal 10:00 seld afsar n temsikniyin n Tdukkla Tadelsant Adrar n Fad ass n sem, ddeqs n warmuden i d-iḍefren. Yella-d ladɣa usarag ɣef « Crif Xeddam amdan, Crif Xeddam anaẓur » sɣur Xeddam Muḥend Ubelqasem. Am wakken temmug tirza i yiẓekwan n Nna Zineb d Nna Taseɛdit iwumi tuɣal tejmilt deg teẓrigt-a. Imi acḥal beddent i tfaska-a n uqennuc mi tent-tuɣ ddrent. Aredqal, imi d-ẓuren yimeḥdar uɣud i tikkelt tis snat, yella-d uberreḥ s yigemmaḍ n umsizwer n uqennuc, ideg i d-yuɣal warraz amezwaru i Massa Ɛerruǧ Faṭma, tameṭṭut n Xalifi. Arraz wis sin, tewwi-t Massa Qerrac Lɛalya, tameṭṭut n Brahimi. Ma yella d wis kraḍ, isaḥ-d i Massa Xaled Yamina, tameṭṭut n Idir. Ma nesmekti-d kra n yisfernan iɣef tsenned tesqamut, ad d-nebder agrurrez n uqennuc, aqqad-is, agerrez n rrqem d ssenf n yizamulen i yettmaggan, akked teqdem n uqennuc.
S teẓrigt-a tis 6, tesken-d i tikkelt-nniḍen tdukkla n Udrar n Fad udem yelhan i tlawin i mazal ṭṭfent deg wansay-a am zik. Aya d ccan, d asebɣes i kra n tin ireffden azdud d tɛellamt deg temnaḍt n Ayt Smaɛel. Ɣer taggara n tmeddit, bdan lɣaci amsegraw sdat ubraḥ n uxxam n yilmeẓyen, i lmend n tmeɣra n ccna n Malika Yami. Dɣa, ama d nettat ama d imẓawanen-is, gar-asen Ɛellawa Behluli, gerrzen tagnit ɣef teɣzi n wazal n sin n yisaragen s tezlatin akk ifazzen n Crif Xeddam iwumi tuɣal tejmilt deg teẓrigt-a tis 6 n uqennuc ansayan.
M. K.