Accueil Tamazight Iṭaksiyen mebla turegt: gar wugur d tifrat

Bgayet : Iṭaksiyen mebla turegt: gar wugur d tifrat

659
- PUBLICITÉ -

Ulamma yettwabdar-d uṭaksi s waṭas deg temdinin, ass-a deg wussan yesɛa azal-is ula deg tudrin. D acu, gar uṭaksi i yettwajerrden ɣer unabaḍ akked win yeffren, yella waṭas n umgarad. Amezwaru-nni yettwassen, ixeddem s wayen i as-d-ixeddem usaḍuf; ama d akuden n lxedma, axelles n tewsiyin, neɣ ladɣa ssumat n usiweḍ seg umkan ɣer wayeḍ. « Iṭaksiyen ibanen, ttafen-ten medden seg tama n tedrimt abeɛda. Imi akken ma llan deg teɣsar anda ḥebbsen, ɣas ini xeddmen yiwet n ssuma n usiweḍ. Ssuma-a, ur tezmir ad tɛeddi tilas skud tella tɛessast fell-asen». Akka i aɣ-d-yenna yiwen n urgaz i ijerrben tuṭṭfa n uṭaksi. Aya d ayen yerzan iṭaksiyen yettwajerrden, i nezmer ad neɛqel s yini-nsen awraɣ neɣ s teplakt-nsen n ufella ideg yura « Taxi ». Maca, kra n wugur yettas-d seg yiṭaksiyen ur nettwaberreḥ; mi ara d-yaɣ yiwen takerrust, ad yili d aṭaksi uffir, ad yuɣal ixeddem deg ssuma i as-yehwan war ma yeẓra unabaḍ. « Iṭaksiyen uffiren, sxedmen tawaɣit deg lǧib n uɣerman. 10 n yikilumitren, zemren ad ssutren 400 n yidinaren. Meḥsub xeddmen ssumat akken bɣan nutni, d wamek ufan tagnit n umsaɣ-nsen ». D awal n yiwet n teqcict i d-yeffɣen taggara-a seg tesdawit. Iban-d ihi seg uwellih amezwaru wugur sɣur wat iṭaksiyen-a uffiren, ladɣa imi ar tura ulac fell-asen lḥers. Ulamma ɣef wawal n kra n madden, ufan ɣur-sen daɣen ula d tifrat. Aya, imi i ten-ttafen anda d melmi bɣan i usiweḍ. Tugart ma yella taluft tezreb. Rnu-as amkan n usiweḍ ur d-yettḥettim uṭaksi uffir. Ɣef tmuɣli-nsen, ɣas ma yessalay taqettunt n uxelles, yessawaḍ melmi tebɣiḍ, ɣer wadeg i tferneḍ kečč.

- PUBLICITÉ -

M. K.

- PUBLICITÉ -