Azal n 10 n wussan, akka tura, ttasen-d waman i d-yekkan seg ubaraj n Ticiḥaf i d-yezgan di tɣiwant n Buḥamza ɣer yixxamen, luɣen. Aya d ayen i izerɛen lxuf ɣer yimezdaɣ n tɣiwanin n lwilaya i tessen seg waman-agi. Seg yimir-n, ttazalen u ttnadin yimezdaɣ ɣef waman zedigen i tissit. win izemren ad d-yaɣ yettaɣ-d , wiyaḍ ttruḥun ɣer tliwa d leɛwanser i d-yezgan deg tudrin d yidurar i wakken ad d-agmen aman. Xas akken deg ulɣu i d-tefkan tkubbanit tazayrit n waman ɣef lehhu n tissit n waman-a, maca imezdaɣ, ttɣunzun-ten. Ala win terra tmara i ten-itessen. Nesteqsa imḍebbren n tkubbanit tazayrit n waman, nnan-d belli “aman-agi lhan i tissit’’, ma d sebba n uluɣu-nsen, d lixsas n waman deg ubaraj, acku yuder s waṭas uswir n waman yellan deg-s. D sebba n lixsas n waman aseggas-agi, aladɣa di tallit n unebdu, rnu ɣur-s imdanen seqdacen s waṭas aman deg tallit-ag, ɣer waya daɣen, ad d-nernu aɣurar, imi tagrest iɛeddan ur ččuren ara deg-s maḍi yibarajen n waman, gar-asen win n Ticiḥaf. Yeɣri useggas.
B.Ben.