Accueil Tamazight Am wass-a, 9 tuber, i yettwet Matoub

Udem gar udmawen : Am wass-a, 9 tuber, i yettwet Matoub

1394
- PUBLICITÉ -

Deg tmesbaninyin mechuren deg tmurt n Lezzayer mebɛed Tafsut Yimaziɣen, ad naf tadyant n 5 tuber 1988 . D tadyant i iḥuzan acennay ameqqran Matoub Lounès imi yettwet s rsas deg ubris-is ɣer Michelet. Tebda-d tedyant mi i d-tella yiwet n temlilit di tesdawit n Tizi Uzzu i lmend n tmesbanin-nni n 5 tuber di tmaneɣt . Di temlilit i d-yellan yeffeɣ-d yiwen n wulɣu anda i d-yessawal ɣer userked d tsussmi mgal wid i d-yettenjaɛen , akked sin n wussan n ussended. Ihi Lounès Matoub akked sin yinelmaden, wwin ulɣuyen-nni ɣer Ɛin Lḥemmam akken ad ten-ferqen, akken ad sfehmen i medden ayen i yellan , deg ubrid ḍeffren-ten-id iǧadarmiyen, sḥebsen-ten, bdan rregmat. Ssulin sin-nni n yinelmaden ɣer tkerrust-nsen, ma yella d Lwennas qarsen-fell-as s 5 n terṣaṣin, teɣli ṣṣura-s, s yin wwin-t ɣer sbiṭar n Ɛin Lḥemmam, mbaɛd ɣer Tizi Uzzu, imir ɣer win n Lezzayer : sbiṭar n Les orangers , syin serḥen-as. Yeffaɣ tamurt iruḥ ɣer fransa imi dinna i llant ttawilat akken ad idawi , yedder 6 n wagguren anda i t-id-tettẓur lmut yal taswiɛt. Yenneɛtab aṭas imi ur yezmir ara ad inaqel afus-is neɣ aḍar-is. Ass n 09 di meɣres 1989, yecna deg wannar n Ukil Remḍan di Tizi Uzzu di tallit-nni yella iteddu s tɛekkzin , akken kan yessufeɣ-d aḍebsi iwumi isemma ‘’Ma yella d rṣas i ineqqen aqlin ur mmuteɣ ara’’, amzun akken d tiririt ɣef tyita. Ɛeddan 29 n yiseggasen si tedyant-a n Tuber 1988, tadyant i mazal deg cfawat n yal aqbayli , ihi akken ḥed ur itettu tadyant-agi amazday aɣelnaw i ustan n timant n tmaziɣt n Draɛ Lmizan ad-as yerr tajmilt ass-a i umeɣras i yefkan idamen-is d asfel akken ad tidir tutlayt d yidles ar ass-a, amazday aɣelnaw i ustan n timant n tmaziɣt, ihegga-d yiwen n leqdic deg umkan anda yettwaɣdar Matoub, deg umkan i yecfan i tyita, imi ad yili unejmuɛ ɣef 10 n tsebḥit n wass-a akken ad mmeslayen ɣef wayen yexdem d wayen i d-yeǧǧa unaẓur.

- PUBLICITÉ -

S.Yamani

- PUBLICITÉ -