Taggara n ddurt-agi yezri, terra tdukla n yimeɣban d wdi yenḥafen “Soummam” s lemɛawna d yimḍebbar n luzin “Yaourt soummamu tajmilt tameqqrant i yixeddamen n tɣiwant yettukelfen s tezdeg n yizenqan d tudrin I d-yezzin i temdint n Uqbu. Tella-d temlilit yiwet deg usensu Atlantis I d-yezgan deg tɣiwant n Uqb anda i ttuferqen warrazen i wazal n 110 n yixeddamen. ”Nekni ur nsetḥa ara s yixeddim-agi-nneɣ, d asizdeg, nefraḥ aṭas s tejmilt-agi, d ayen ara d-yernun afud i yixeddamen”, i d-yenna yiwen n uxeddam . D tikelt tamezwarut i yeḍra ccɣel icuban wagi di temnaḍt n Ssumam. Ixeddamen n tezdeg d yiwet n tecriḥt di tmetti-nneɣ i yuklalen aṭas n leqdar, imi tezdeg d aɣbel-nsen n yal ass. Ixeddamen n tezdeg n Uqbu uklalen aṭas n leqder, ladɣa send aɣlaq n ugudu n tɣiwant n Uqbu nnig n sin wagguren. Asmi yefra wugur-nni, din din, ixeddamen n tezdeg deg wazal 8 wussan, xeddmen deg yiḍ deg wass almi jemɛen akk iḍumman yellan deg yiberdan. “Imi asizdeg d useḥbiber ɣef ugama, ilaq ad yili d aɣbel n medden akk. Nessaram yal yiwen deg-neɣ ad yessixfef taɛkemt fell-asen. Ma ur nessaweḍ ara ad nessizdeg , ur nettdeggir ara iḍumman di yal amkan” i d-yenna yiwen n umezdaɣ. Tajmilt meqqren i yixeddamen n tezdeg.
B.Benhamouche