Macahu !Ahu ! Ṛebbi ad tt-yesselhu ad tiγzif anect usaru. Llan sin n watmaten, aqcic d teqcict d igujilen, temmut yemmat-sen, babat-sen iεawed zwaǧ, yewwi-d yiwet n tmeṭṭut d taweεrant, tekreh-iten msakit. Yambabat-sen-agi ula d nettat tesεa snat n yessi-s. Ihi arrac-nni igujilen, sεan tafunast, ttawin-tt kessen-tt. Yambabat-sen ur asen-tettak ara ad ččen ḥaca uraw n yiniγman ixerbucen, i ttaken medden i lmal, d tceqqimin n uγrum. Ad ffγen seg uxxam seg ṣbeḥ alamma d lmeṣbeḥ ad ksen tafunast-nsen di lexla. Yambabat-sen tewhem, yessi-s simmal ṭṭaεifent, irbiben-is simmal ttafen iman nsen. Almi d yiwen wass, tenna-as i Σica, yellis-nni tameqṛant, ad ten-tetbeε ad ten-tqareε d acu i xeddmen. Taqcict tetbeε-iten tewweḍ-d γer yemma-s tεawed-as akk ayen twala:’‘A yemma walaγ-ten la teṭṭḍen tafunast di lexla’‘. Dγa tameṭṭut tamcumt tenna-as i yelli-s ad teddu d warrac nni:’‘ Anda i ṛuḥen ad tṛuḥeḍ, anda qqimen ad teqqimeḍ ayen xedmen ad txedmeḍ’‘. Taqcict tetbeε-iten, akken temmeγ ad teṭṭeḍ tafunast am warrac-nni, tafunast tewwet-itt-id s uḍaṛ-is γer deffir tesseγli-as-d tiṭ-is. Akken twala yemma-s yelli-s tuγal d taderγalt, tettmeǧǧid ar tafunast yesdreγlen yelli-s ala akcam ara tekcem ssuq. Yewweḍ-d wass n ssuq, yekker urgaz yewwi yid-s tafunast ad tenz. Tafunast-nni telha mačči d kra. Akken kan yewweḍ ssuq, imsewqen akk zzin-d fell-as ad tt-sawmen. Cwiṭ kan akka iεeddi-d ṭṭiṛ deg yigenni yessawal s lqeḍra n Ṛebbi:’‘Tafunast igujilen! ur tettnuzu ur tṛehhen ! Tafunast igujilen! ur tettnuzu ur tṛehhen ! Akken i d as-slan yemmsewqen-nni, mkul yiwen s anida i yerra, wa yeqqar i wa: ‘’Ad aγ-yemneε Ṛebbi si deεwessu n yigujilen!’‘. Yettawi-tt akken-nni urgaz tlata ledwaṛ γer ssuq, yettara-tt-id γer uxxam, ur tt-yettsawam ḥedd.Tameṭṭut-is teggul, tenna-as: ‘’Ala tuγalin ur d-tettuγal tfunast isdreγlen yelli, zenz-itt i uksum, efk-itt i ugezzar!’‘. Akken i tt-yewwi urgaz i ugezzar, arrac-nni imeγban ṛuḥen γer uẓekka n yemmat-sen ttrun, ttrun , ttrun ar almi d-yenṭeq γer-sen yiwen n ṣṣut yenna: – Ṛuḥet γer ugezzar, tessutrem deg-s ad awen-d-yefk akerciw-nni-ines, awit-tt-id akken yeççur d leγbaṛ, tessarsem-t γef uẓekka-inu….
Tettkemmil Seg tgemmi n teqbaylit