Amar Sghir, s yisem-is aḥeqqani Outoudert Amar, ilul ass n 27 tuber 1943 deg taddart n Tala n Tazert, yetabaɛen zik ɣer tɣiwant taqdimt n Tassaft, ma d tura deg tɣiwant n Iboudrarene. D tamnaḍt i d-yefkan aṭas n yinaẓuren yecban: Kamel Hamadi, Lounis Ait Menguellet, Idir, Amar Ezzahi…atg. D amedyaz, d acennay yerna d ameskar, annect-agi isebgan-d belli d anaẓur s timmad-is.
Tudert-is
Isɛedda temẓi-is deg taddart-is, armi yewweḍ 8 n yiseggasen deg leɛmer-is, syin yedda d baba-s ɣer Souk Larbâa deg tmurt n Tunes. Yeqqim dinna 3 n yiseggasen, dɣa ifuṛes tagnit yeɣra deg uɣerbaz tutlayt n tefransist akked tin n taɛrabt. Syin akin mi d-yuɣal deg useggas n 1954 ɣer taddart-is, yesselmed cwiṭ n taɛrabt. Syin mi yunag baba-s ɣer Fransa, yuɣal netta s aɣerbaz yellan deg taddart, i wakken ad ikemmel almud-is, dɣa dinna i d-iḥfeḍ kra n tezlatin yecban: Tarix n tmurt-nneɣ, Ɣur-i yiwen n umeddakkel, Min Jibalina…atg. Deg useggas n 1957, iruḥ ad d-iẓer baba-s deg tmurt n Fransa. Syin yexdem dinna kra n yiseggasen, tettunefk-as daɣen tegnit i wakken ad yissin icennayen-agi imeqqranen: Cheikh El Hasnaoui, Slimane Azem, Zerrouk Allaoua…atg. Dɣa yeḥfeḍ-d tizlatin-nsen s sshala tameqqrant. Deg tuber 1959, yuɣal-d ɣer tmurt-is mebɛed aggur kan ɣef wasmi yemmut baba-s, syin yuɣal yexdem dagi deg tmurt kra n yiseggasen deg Lezzayer Tamaneɣt, seg useggas n 1962 d asawen.
Ansa i d-yekka yisem-agi “Amar Sghir”
Isem-agi n unaẓur Outoudert Amar, yettwassnen s yisem n tẓuri “Amar Sghir”, d ameddakkel-is acennay You cef Abdjaoui i d as-yefkan, imi deg lawan-nni yella meẓẓi deg leɛmer-is. Ma d anamek n yisem-agi Amar Sghir s teqbaylit d Amar amecṭuḥ neɣ ameẓyan.
Amecwar-is
Yebda amecwar-is n tẓuri deg rradyu n t ruplan, Balak balak, Tajeǧǧigt lwerd yefsan. Syin akin, yessekles 4 n tezlatin gar mraw d sin-agi (12) i d-nebder, deg snat n tkasiḍin n “45 tours”, imi yal yiwet yexdem deg-s snat n tezlatin. Tizlatin-agi, d rrebɛa-nni timezwura yessekles deg umaṭṭaf: Ay ayetma acḥal itt-cedheɣ, Ttxil-k ay itbir xebber-itt, Lfiraq ay ayetma yewɛer, Snat n leḥwayeǧ ɛuhdeɣ-tent. Snat-agi n tkasiḍin n “45 tours”, issekles-itent ɣer tezrigin n Philips. Ma deg useggas n 1969, yessuffeɣ-d snat n tkasiḍin n “45 tours”, mebɛed mi yessekles 4 n tezlatin timaynutin deg ustudyu “Laḥen El Djazair” deg useggas n 1969. Tizlatin-agi, d tigi: Slam n llah fell-awen, Ahlellu, D baba-m akked baba, Je vois tes yeux qui brillent. Syin ɣer-s deg useggas n 1978, yessuffeɣ-d takasiḍt-is taneggarut, yewwin snat n tezlatin-agi timaynutin: Ttruɣ ɣef zzher-iw akked tezlit-nni Lmut taɣeddart swayes yettwassen aṭas.
Tijmilin i d-as-yuɣalen
Axxam n yidles Mulud Mɛemmri s timmad-is, yerra-as snat n tejmilin ta deffir ta, i netta d kra n yicennayen-nniḍen. Tamezwarut, tella-d deg useggas n 2006, tayeḍ deg useggas n 2011. Ma deg useggas n 2014, d tiddukkla n taddart n Tala n Tazert, i d-as-ixedmen tajmilt meqqren, yeddan ɣef teɣzi n tlata wussan.
Lmut d temḍelt-is
Yewweḍ leɛfu Ṛebbi ass-nni lḥed 12 deg waggur n unbir 2017, yettwamḍel deg tmeqbert n taddart-is, ass-nni n letnayen 13 deg waggur-agi n unbir ideg nella. Tamḍelt-is, ḥedren-tt waṭas n yiwudam n yidles d wiyaḍ, yecban: Rabah Ouferhat, Salah Ait Ziane, lwali n Tizi Uzzu Mohammed Bouderbali, Atmani, Nabila Goumeziane, Ait Menguellet Abdelouhab…atg.
Adaoun Abdelghani