D isalli yessefcalen ifadden i yuzzaren ama di tmurt am deg berra ɣef tmettant n umeɣnas Said BOUKHARI. 55 n yiseggasen kan deg leɛmer-is mi t-teccelqef lmut seg yirebbi n twacult-is d lehbab-is. D amdan i d-ilulen i wakken ad yennaɣ ɣef tugdut, ɣef yizerfan n umdan i wakken ad d-yessekfel lasel-is win akken yettwaɣebban acḥal d lqern. D tamaziɣt i yeẓẓan deg-s tismin, tabɣest i wakken ad yeddu fell-as, acku ayen i tekka tudert-is ur yuniz i uzaglu i d-yersen ɣef ugdud. Yedda, yelḥa, isuɣ, i wakken, ass-a, inelmaden yellan akk d arraw-is, qqaren-tt, ttarun yis-s, yerna deg uɣerbaz. D amdan ttqadaren medden irkelli, acku ẓran-t seg wid ur yettɣurru udrim wala cciɛat. Iteddu s uzday n lqedd imi amennuɣ-is d win yebnan ɣef tidet d sswab. Imeɣnasen, n at ufella neɣ n at wadda, ttqadarent i merra i lmend n tezdeg yekseb, d wawal ibedden ɣef tidet. Ass-a, tamettant-is, teɣdel-d leḥzen ɣef merra wid terḥa taluft n tlelli, yuklal tajmilt almend-is netta, win akken yellan d amedya i waṭas n Yiqbayliyen. Ilul Said Boukhari ass 28 deg cutember 1962 deg taddart n Bouarfa tama n Maatkas. Yella d ameɣnas ameqqran deg Umussu adelsan amaziɣ MCB, ladɣa deg yiseggasen-nni n 1980 deg temdint n Dellys anda yella yeqqar. Yella deffir n tikli tameqqrant i yeḍran deg Lezzayer tamaneɣt deg useggas n 1990 akked uneḥbus ɣef leqraya deg useggas 1994/195 i yessawḍen ɣer unekcum n tmaziɣt ɣer Uêrbaz azzayri uɣerbaz. Yehlek aṭṭan n kunsir seg yulyu iɛeddan, yemmut ass-nni n larebɛa yezrin.
Smail Merzouk