Ahat mi ara yekcem ugrud i tikkelt tamezwarut ɣer uɣerbaz, ugur-is ameqqran d aɣerbaz s timmad-is. Meskud ad as-yekkes axxam-is i kra n wakud, ad t-yessebɛed seg yirebbi yeḥman n tyemmat d usnefcec-nni n yimawlan. Ilaq kra n wayyuren akken ad yennam unelmad amaynut axxam-is n tmussni-nniḍen i yeqqnen srid ɣer uxxam-is n tnezduɣt.D acu kan, llan wuguren i d-yettbinen umbeɛd, ḍḥan-d d iɛewwiqen i uqcic deg umecwar-is n tɣuri. Amezwaru d taẓayt n uqrab-is, i yettɛeddayen tikwal lqidar n wayen iwumi yezmer d ttɛebga. Ladɣa mi ara yili wahil n uselmed ur yettwaqader akken iwulem sɣur uselmad, neɣ dɣa deg wahil n useggas aɣurbiz i yella wugur. Dinna, yettaf iman-is uqcic yettɛebbi deg uzagur-is ayen swayes ara iɣer sin n wussan, ama s ukukru neɣ s uḥettem. « Ttɣaḍen-iyi nezzeh warrac-a mi ara ten-id-maggreɣ ttɛebbin aqrab qrib yewweḍ-iten-id di teɣzi. Ttwaliɣ ilaq kan ad nbeddel tarrayt n uselmed akken ad nessifsus taɛkemt fell-asen ». D awal n yiwen n ubabat seg Ayt Smaɛel. Yewwi-d ad d-nesmekti d akken ugar n leɛtab iwumi ur neǧmen, taẓayt-nni tezmer ad d-teglu s waṭas n waṭṭanen, gar-asen wid icudden ɣer ujgu n uɛrur. Ugur wis sin i d-yettqabalen anelmad amaynut deg uɣerbaz, d aselmad-is. D ayen yesḥissifen imi d tilawt yellan. Deg tɣiwant n Ayt Smaɛel dɣa, i yeggugen s wazal n 65 n yikilumiṭren ɣef Bgayet, aṭas i tesɛa d tinagiwin ɣef kra n yiselmaden ur nessin amek ad gen lxedma-nsen s wudem yelhan. Tikwal d nutni i yettilin d ssebba ma yella ur yeẓwir uqcic deg tɣuri. « Yiwet n tikkelt yekcem-d mmi s axxam itettru. Mi t-steqsaɣ acimi, yenna-yi-d d aselmad-is i t-yegren deg texzant n tneɣrit i xilla n wakud. Ɛni d win i d abrid swayes ara txellseḍ anelmad ma ur yessin neɣ yeɣleḍ di kra? » I aɣ-d-tenna s usḥissef yiwet n tyemmat. Send ad d-ternu: « Seg yimir-nni iɛuf aɣerbaz. Tuɣal-as tneɣrit d rrehba armi yettaggad ad tt-yekcem ». Aṭas n yinelmaden i isebbren deg tsusmi ɣef wayen sɛeddayen d lbaṭṭel deg tneɣrit-nsen. Daymi ilaq ɣef tdukkliwin n yibabaten n warrac, ad ldint ugar allen, ladɣa ma neẓra d akken akk imal n unelmad yeqqen ɣer uselmad.
M. K.