Ttkemmilent tmesbaniyin d tikliwin di temnadt n leqbayel. Anect-a, akken ad sbeggnen lɣiḍ-nsen mgal rray i d-yeffɣen ussan-agi ineggura. Tikli i d-yellan ass n 11-12-2017 tettuhegga-d sɣur yinelmaden n tesdawit n Mulud Mɛemmri akken i d-berḥen mačči d ikubar isertiyen i tt-id-iheggan. Aṭas n wid i d-yerran i teɣri n yisdawanen akken ad ttekkin di tikli, qeccuc meccuc neɣlen-d ɣer tizi uzzu akken ad inin s yiwen n wawal : Ma ulac Tamaziɣt ulac , ulac , ulac. Ma yella deg Tizi Uzzu akked Bgayet, ɛeddant tmesbaniyin deg teswiɛin n talwit, deg tesdawit n Akli Mouhend oulhadj n Tubiret, yekker waṭas n cwalat. Ayen yeǧǧan imḍebbren n tesdawit ad suffɣen yiwen n ulɣu i d-yeqqaren belli ad tettwaɣleq tesdawit war ma nnan-d azemz n tuɣalin ɣer uselmed, imi leqraya ur tezmir ara ad tili s cwalat-a. Ma yella d tasdawit n Bgayet, kecmen yisdawanen di ddurt tis snat n usunded. Si tama-nniḍen, Agezdu n tutlayt d yidles Amaziɣ n Tizi Uzzu ula d netta mazal yeṭṭef di rray-is d akken ad ikemmel usended. I lmend n wayen akk la iḍerrun, nesteqsa-d amaswaḍ n tmaziɣt di Tizi Uzzu Mass Boussad Kebir ɣef rray-is deg wayen i iḍerrun , yenna-d : « mi ara nwali tikliwin i d-yettilin ɣef tmaziɣt, yettuɣal-d ubeḥri i turet, maca si tama-nniḍen, anida-tt tuddsa ara iwellhen amussu n yilmeẓyen i wakken ur d-yettenfal ara ɣer wayen i izemren ad d-yezzi fell-aɣ azekka », yerna-d deg uɣarab-is n facebook d akken : « Tiddukliwin tidelsanin ara yessdukklen iɣallen ɣef yiwen n yiswi. Tugget deg-sent, mmutent neɣ uɣent abrid n ṭṭbel d lɣiḍa. Anida-tt tdukla n yiselmaden n tmaziɣt n Tizi Uzzu ? » ikemmel deg wawal-is : « Ur ilaq ara kan ad teḥbes ɣef tikliwin, maca ayen yugaren akk aya, ilaq axeddim ɣef Tmaziɣt , win yebɣan ad seggem, iseggem iman-is ». Nesteqsa-t ɣef uzekka n Tmaziɣt , yenna-d : « Imal n tmaziɣt, deg yiles n yimawlan-is, tifrat deg-nneɣ kan ara d-tas ».
Souhila Yamani