I tebγud γezzifed ay iḍ, dulaqrar ad yali wass. Yak akka i yella deg wawal imi fad yesweɛduyen ur yeskuffur. Ayen akk i ttraǧun yimaziγen n Lezzayer acḥal d aseggas, yerza-d lawan n unejmuɛ n usqamu n yineγlafen i d-yellan ass n larebɛa yezrin.
Dγa, d aselway n tigduda s timmad-is i ijerden s wudem unsib d akken amenzu n yennayer ad yili d ass n tγimit, rnu ad yettuxellas fell-as uxeddam. A rbeh, a tafat, yeffeγ leɛtab γer tafat. Ulamma aγmis-nneγ d win i tt-igezmen deg rray, yerra amenzu n yennayer d lficta 15 n yiseggasen-aya, meɛna lbenna n waya mi ara yili deg temnaḍin merra n tmurt. Tura, teddez, tebrez, amenzu n yennayer yekcem deg tfaskiwin tiγelnawin n tmurt. γer tama n waya, iwellihen n uselway n tigduda, rzan asebded n tkadimit ara d-yelhun s usnerni d usemsawi deg tutlayt n tmaziγt, tin akken yuγalen d tunsibt seg waggur n furar 2016. Yedda lḥal seg wasmi tettuɛawed tmendawt anda tuγ tmaziγt amkan-is, d acu kan leɛdil n uɛeddi γer useqdec n yisuḍaf, yebda ikeccem deg tatut. Am wakken i tuγ tanumi, iwulem akka cwit n cwal i wakken ad d-tban tafat. Tudef tmaziγt s aγerbaz s uγunzu n lakul azal n tmanya n wagguren. Tewweḍ d tutlayt taγelnawt deg tmendawt di 2002 s cwal n tefsut taberkant. Tura akka yeqqers-d yennayer s uhetwir yekkren deg waṭas n temdinin ladγa tisdawiyin. Akka tura, segmi kan i d-yeffeγ yisalli n tkadimit, ‘’s akersi teγseb tazla’’. Aṭas i yettnadin amkan deg-s, dγa yal wa yettnadi ttawilat ara t-yessiwḍen. Asirem n yal amaziγ ad iwali tasqamut ara yesseddun timsal d wid yuklalen, wid akken ara d-yasen s nniya s axeddim, rnu sɛan tirmit deg leqdic γef tutlayt-a deg yiḥricen yemgaraden. Aṭas i yugaden ad teḍru d tkadimit am wakken i tedra d tesqquma timenza, tid akken ur nexdim kra i tmaziγt γas akken tadrimt tella, meɛna imi tγab nniya, kullec yurag γer wasif. Tamsalt-nniden i d-yeddan tikkelt-a, d ayen yerzan aselmed n tmaziγt deg twilayin i merra n tmurt. Ass-a, ad tt-nad deg 38 n twilayin, meɛna tella temnaḍt ideg ara naf yiwen ar sin n yiselmaden. Tamaziγt, ur teɛni ara inelmaden akk, rnu mazal aɛewwiq-nni n lxetyar i win kan i tt-yebγan ! Dγa dagi ara d-yili leqdic s telqay n tkadimit ara yizmiren ad tt-tessiweḍ γer merra iγerbazen. Ahat, aseggas n 2018 ad yessuzef tagut γef tmaziγt yuklalen ugar n wakken i tella tura.
M. Smail