Thegga-d ddurt iɛeddan tgezmi n Tizi n Berber n Tesbeddit Bgayet i yidles d tussniwin, s tallelt n tɣiwant-a, yiwen n ttiɛad n usḥesses ɣef waṭṭan n uxenẓir (lkunsir) n yidmaren, i yekkaten abeɛda tilawin. Ula d irgazen, yettili-d wanida i teṭṭfen aṭṭan-a tikwal maḍi. Deg wahil n wass-nni, d asarag i d-yemmuggen sɣur tmazzagt Massa Buǧaǧa ɣef uḥader seg waṭṭan-a n uxenẓir d wamek ilaq ad yili uɛeyyer n yal tameṭṭut ɣef zik lḥal. Imi mtawan yakk imussnawen n tesnujjya deg umaḍal d akken ma yettwawef waṭṭan di tazwara mi ara d-iban, llant aṭas n tegnatin akken ur yettḍurru neɣ ad yeḥlu yakk. Wamma ma teḥsa tmeṭṭut s waṭṭan-is mi ara ifit lḥal, ur tesɛiḍ acu tezmer ad d-teg, d ayen yettsuddun tesnujjya tatrart. Daymi lhant tegnatin n uselɣu d usḥulfu ma ttilint-d seg tikkelt ɣer tayeḍ, abeɛda deg yidurar. Skud mazal aṭas n tmesdurar ur neẓri d acu-t waṭṭan-a, ulamma aql-aɣ deg zzman ideg tenṭer ayendin tmeṭṭut seg-s. Ula d leḥsabat i d-iteffɣen yal aseggas ɣef umḍan amaynut n tid i yewwet waṭṭan-a axabit, mačči d wid yessefraḥen yakk. Send ad taḍen yiwet ihi, ad terwu tazzla i udawi yuqan, yelha ma tga aɛeyyer ɣur walbaɛḍ n yimsujjiyen.
M. K.