Accueil Tamazight Ad as-tuɣal tejmilt, azekka, i Cherif Kheddam

Lezzayer tamaneƔt Tameɣra n ccna deg tzeqqa Opéra B.Bassaïh

Ad as-tuɣal tejmilt, azekka, i Cherif Kheddam

1053

Azekka n ttlata, 23 yennayer 2018, ɣef lewhi n 19h00 n tmeddit, ad tili tmeɣra meqqren n ccna deg tzeqqa n “Opéra” Boualem Bessaih, yellan deg temdint n Lezzayer tamaneɣt.

Tameɣra-agi, ad tili d tajmilt i ucennay ameqqran Ccix Cherif Kheddam, i lmend n wayen akk i d-yefka i tezlit taqbaylit. D taneɣlaft n yidles i d-iheggan leqdic-agi adelsan, yettuneḥsaben d asmekti meẓẓiyen i urgaz meqqren aṭas, yuklalen ugar n wannect-a, maca wicqa. Tameɣa ideg ara cnun ddeqs n yicennayen imeqqranen n tezlit taqbaylit, yecban Medjahed Hamid, Ali Meziane, Taleb Tahar, Arezki Ouali…atg. Ad d-nesmekti imeɣriyen-nneɣ s tmeddurt akked tesfifin n unaẓura-agi mucaɛen deg tmurt n Lezzayer merra. Ilul ass n umenzu n yennayer deg useggas n 1927, deg taddart n Boumessaoud i ittekkin ɣer tɣiwant n Imsouhel, deg lwilaya n Tizi Uzzu. Yella d anaẓur s timmad-is, imi yella d amedyaz, d acennay yerna d amẓawan. D netta i d acennay aqbayli i yesseqdacen aṭas n wallalen n lmusiga deg tuɣac-is. Yelmed aẓawan asmi yella d ilemẓi, asmi yella deg tmurt n Fransa. Deg yiseggasen n 1950, i yexdem tizlit-is tamezwarut “Yelli-s n tmurt”. Syin akkin deg useggas n 1953, i d-yessuffeɣ tasfift-is tamenzut i wumi isemma “Nadia”, ideg llant 6 n tuɣac gar-asent: Sbaḥ lxir, Qqim di lehna, Nesɛa lḥeqq…atg. Sakin deg useggas n 1958, yerna-d album-is wis sin, iwumi iga azwel-a “Ǧerǧira”, ideg llant 15 n tezlatin, nezmer ad nebder gar-asent: Leḥbeq, Lɣerba, Lukan i d-ttuɣal temẓi, Mennaɣ ad kem-sɛuɣ d lǧar, Fehmet a medden…atg. Tin ɣur-s, sin n yiseggasen kan, yerna-d aḍebsi wis tlata “Bgayet telha”. Tlata n yiseggasen umebɛed, yerna tasfift tis rebɛa “A lemri”, ideg llant 10 n tezlatin, gar-asent: Ay itran, Anef i lemwaji, Anda luleɣ, Anda tleḥḥuḍ…atg. Deg useggas-nni dɣa yuɣal-d ɣer tmurt n Lezzayer, yuɣal ixeddem yiwet n tedwilt deg rradyu tis 2, iwumi fkan isem n “Iɣennayen n uzekka”. Syin akkin yeqqim alammi d aseggas n 1978, i wakken ad yessuffeɣ aḍebsi wis xemsa, i wumi yefka isem n “Sliɣ i yemma”, ideg llant 16 n tezlatin, ad nebder gar-asent: Ẓriɣ lxir, Ttɣenniɣ tamurt-iw, Tirga ufennan, Tasusmi, Tensa tafat. Deg useggas n 1980, i d-yessuffeɣ tasfift-is taneggarut iwumi isemma “A tilawin”, ideg llant 6 n tezlatin, gar-asent: A tin yuran, Yelli-s n tmurt-iw, Aḥbib n ddima…atg. Syin d afella, ixeddem kan timeɣriwin ɣef usayes. Ma deg useggas n 1995, yunag tikkelt-nniḍen ɣer Fransa, i wakken ad idawi. Syin ass n 23 deg yennayer 2012, yewweḍ leɛfu Ṛebbi deg sbiṭer n Paris, anida yella yettdawi yakkan. Ass n 26 deg yennayer 2012, wwin-t-id ɣer tmurt. Azekka-in n 27 yennayer yettwamḍel deg taddart-is Imsouhel. Ulamma ɛeddan tura 6 n yiseggasen ɣef lmut-is, maca mazal ṣṣut-is aḥlawan yesuzun imeẓẓuɣen-nneɣ, mazal tugna-s tressa deg wallaɣ, mazal imeslayen-is teddun-d deg wawal. Ihi xas sgunfu deg talwit a Cherif Kheddam, azal-ik meqqer, amecwar-ik ɣezzif, ma d tijmilin ayen i d ak-yettwaxedmen drus. Xas teǧǧiḍ-aɣ, maca teǧǧiḍ-aɣ-d.

Adaoun Abdelghani