Ussan-a kan ara d-yeffeɣ, ɣer teẓrigin Asirem n Tubiret, udlis amaynut n umsefɣul Kamel Bentaha, seld kra n wayyuren n uraǧu. Am wakken llan wid iḥemmlen ungalen, ammuden n tullisin d yisefra, neɣ timezgunin, i llan wid iḥemmlen tisfifin n wunuɣen. Abeɛda imi ssenf-a n tẓuri yelha ayendin i urebbi d uselmed n warrac imecṭaḥ. Dɣa, d ayen i d iswi n Mass Kamel Bentaha, skud yuqa uqeddic-a nezzeh s teqbaylit, ha-t-an yerna-d adlis-nniḍen s uzwel n “Tafɣulit”. Ad yettwarnu i wayen i d-yessaẓreg ar tura d idlisen, gar-asen snat n tesfifin n wunuɣen s teqbaylit d udlis n yifɣulen. Ihi, kra n wussan kan, tzemrem ad t-tafem deg waṭas n tnedlisin n Tmurt. Ilul Kamel Bentaha deg tɣiwant n Yiɛeẓẓugen, aseggas n 1968.
M. K.