Accueil Tamazight Yexser uẓeṭṭa n tilifun

Ayt Smaɛel : Yexser uẓeṭṭa n tilifun

1195
- PUBLICITÉ -

Ugar n ddurt i sɛeddan yimezdaɣ n tɣiwant n Ayt Smaɛel, akked wid n Tsexriwt, war aẓeṭṭa n tilifun uqɛid. Aya yeǧǧa imezdaɣ ad mmɣen deg wurrif akked ucewwel imeqqranen annect iḍul uɣilif-a. Ladɣa imi tikkelt-a, yekka-d wugur seg Djezzy, aẓeṭṭa n tilifun amezwaru i yelhan deg Ayt Smɛel. Wamma wid n Mobilis d Oredoo, yezga uɣbel-nsen seg waṭas-aya tura, ar ass-a urɛad yefri. « Nesteḥyar ayendin abrid-a mi d-yekka uɣilif seg uẓeṭṭa ifazzen ɣur-neɣ seg wacḥal tura d aseggas. Iḥun Rebbi ur iɛeṭṭel ugar n wakud, ufan-as-d dayen tifrat. Wamma tili wiss amek ara nexdem ». D awal n yiwet n teḥdayt seg Ayt Smaɛel. Deg yiwen n usentel, ayen yeǧǧan axrab n uẓeṭṭa-a yesqelleq nezzeh imezdaɣ n tɣiwanin i d-nebder, mačči kan imi ur zmiren ad siwlen neɣ ad ceyyɛen izen. Maca imi ula d ayen sɛan d idrimen tikwal ad d-ibin, tikwal ad iruḥ, ad ten-id-tluɛa taɣect yettwaskelsen ad as-tiniḍ ur sɛin. Ɣef leḥsab n tkebbanit n Djezzy, i terza taluft, yella icudd uɣilif-a ɣer kra n yimahilen n usetrer n uẓeṭṭa-nsen, ideg qeddcen imir-nni. Ɣef waya ihi, uznen iznan i yimsaɣen i yettwaḥuzan s uɣilif-a, ideg nezmer ad nɣer aya: « I lmend n tmehlin n usetrer, yella-d kra n uddebdeb deg uẓeṭṭa-nneɣ iḍelli. Ttxil-wat qeblet asaruf-nneɣ ɣef ucewwel i d-iḍefren ». Ad d-nerr kan awellih d akken mačči ala yiwen n wass i yexreb uẓeṭṭa, am wakken i d-yeqqar yizen, wanag azal n ddurt neɣ ugar.

- PUBLICITÉ -

M. K.

- PUBLICITÉ -