Yerza lwali n ugerzu n Tizi-Uzzu, deg taggara n ddurt iɛddan, ɣer waṭas n tɣiwanin n ugerzu, gar-asent taɣiwant n Lemɛatqa, anda yesuẓet aṭas n yisenfaren n unegmu, d usefqed n kra n srabes n uwanek d leqdicat yemgaraden n yisquma n tuddrin. Gar wayen yettwajarden deg wahil n tirza n lwali, d asunẓet usekcum n lgaz n temdint i uɣerbaz amenzu Takour Mohammed n Zlibou, i mi d tikkelt tamenzut ara yecɛel lgaz n temdint deg uɣerbaz amenzu deg tɣiwant n Lemɛatqa. Tirza n lwali d uselway n Usqamu aɣerfan n ugerzu n Tizi-Uzzu akked yemḍebbren n srabes yemgaraden, tella-d diɣ d asefqed ɣer uxxam n usejji n tɣiwant yenḥafen deg yal tama, ama seg tama n yimejjayen, ttawilat n tujjya neɣ d idigan n tujjya. Dɣa ifures uselway n Usqamu aɣerfan n tɣiwant n Lemɛatqa tagnit-agi i uskan n lexṣas yellan deg uxxam-agi n usejji d iɣeblan n tɣiwant s umata. Syin iweɛɛed lwali d akken ad tili tallel i tɣiwant deg yeḥricen yemgaraden. Deg wahil n tirza, diɣ, yessefqed tasqamut n taddart n At Zɛim d tddukkla tadelsant Tigejdit n At Zɛim anda yessers tameqqunt n yijeǧǧigen ɣef lerwaḥ n 44 n yimeɣrasen n taddart. Syin, iruḥ ɣer usalay n tddukkla, anda iweɛɛed diɣ s tallslt n taddart. Deg taggara n tirza ɣer tɣiwant, yesunẓet lgaz n temdint deg taddart n Tizi Tzeggart , anda yecɛel s wudem unṣib lgaz deg Tsirt n uzemmur n Mass Raib Ammar. Tirza n lwali, tewwi-t ɣer waṭas n tɣiwanin n ugerzu anda yesunẓet, yessefqed isenfaren n unegmu , seg tɣiwant n Buɣni, Ssuq letnin d Lemɛatqa.
Ali Zalouk