Aḥric wis 4
Rran yitbiren akk tiεedsin s unγab d uγiwel γer teqbuct, ur tewwiḍ ara timirt ( ssaεa ) tefra taluft, ssrafgen akk yifrrax, uγalen s imeḍqan-nsen. Yennecṛah wul n teqcict almi d ayen kan, tγil ad teddu γer tmeγra war uguren, tewwiy-as taqbuct-nni i yambaba-s. Maca tameṭṭut tenna-as: ‘’Ala a Mm Yiγiγden, ur tesεiḍ ara icettiḍen, yerna ur tessineḍ ara ad tcedḥeḍ, ad rwun kan deg-m medden tadṣa!’’. Akken twala akka, tserreḥ daγen teqcict d imeṭṭi, tuγal tenna-as: ‘’Lemmer ad tsefḍeḍ tikkelt-agi iγiγden seg snat teqbucin n tεedsin di yiwet n timirt, ad tizmireḍ, ad tedduḍ“. Tenna-as i wul-is. D awezγi ad tefru taluft am ta. Akken d-terwi yambaba-s snat teqbucin n tεedsin deg yiγiγden, teffeγ daγen teqcict γer deffir teḥnact, tessawel s igenni:
‘’Ay aεssas ur neččax, ay at wassa d yimir-n.
Azent-iyi-d yakk ifrax, ceyyeεt-iyi-d itbiren!
Yal wa s tqabubt s txenfuct,
ad yesfed iγiγden seg teqbuct!”
Tessa timeḥremt tazedgant γef tγerγert, tesmar γur-s tiεedsin-nni, ulin iγiγden, wwḍen-tt-id daγen sin yitbiren d imezwura, drus kan almi d-ddan yifṛax akk di lejfaṛ-nsen am tikkelt tamezwarut, ur yewwiḍ ara uzgen n timirt taluft tefra, Faḍma teεqel argaz-is, ifṛax bernen sanida i d-kkan. Ul n teqcict yennecṛaḥ yules, tγil dayen tewweḍ asirem-is, ad teddu γer tmeγra. Ɣas akken tessas-d ayen yellan d awezγi, ayen yugaren daγen tiwin n uyefki n tsedda di tcullitdt n mmi-s, n waman i γef mnaqarren yidurar neγ tukksa n tmellalin ddaw tsekkurt ur tettfaq, maca tenna-as yambaba-s: ‘’Ur yelli d acu ad am-d-yawi yakk wannect-a, ala ur tettedduḍ ara yid-ne&gamma,; acku ur tesεiḍ ara icettiḍen yelhan, yerna ur tessineḍ ara yakk ad tcedḥeḍ, ur nestufa ara, ad rrwun deg-neγ medden tadṣa di lğal-im… Tettkemmil
Yerra-tt-id seg talmanit Essaid Ait Maamar