Accueil Tamazight Yella-d usmekti seg yal tama

Asfuggel n tefsutin n 1980 d 2001 : Yella-d usmekti seg yal tama

402
- PUBLICITÉ -

Am yal aseggas, yettili-d usmekti n Tefsut n yimaziɣen akked Tefsur taberkant seg yal tama n tmurt, neɣ ɛad ula deg berra, ladɣa deg Fransa, Kanada, Bijik d Marikan.

- PUBLICITÉ -

Yettili-d s umta s tmesbaniyin, timsikniyin, amezgun, ccna…atg. Ulac d anwa yettun ussan iberkanen i iɛeddan ɣef tmurt n leqbayel deg yiseggasen n 1980 d 2001. Ayen yeḍran deg teswiɛin-nni, yersex deg tkatutin n medden, ladɣa wid i terza s waṭas taluft, i tent-yuɣen akken-nniḍen ɣas ur ɣlin d iseflan am watmaten-nsen. Ulamma ismektiyen, qqimen kan deg yiqerra, maca ula d tijmilin werǧin xussent neɣ ttwakksent i yimeɣnasen yeɣlin deg yiseggasen-nni, werǧin yettu-ten ugdud yezdin yid-sen idim d lasel. Yal mi ara d-ttqaraben yizmaz n tedyanin yeḍran, aṭas n leqdicat i d-yettwaheggayen deg temnaḍin yemgaraden anda ttilin Yiqbayliyen, ama sɣur tddukkliwin neɣ sɣur tamiwin-nniḍen, i wakken ad yili usmekti d win i d-yesmektayen iman-is, i d-yesbeyyinen azal n tejmilt i widak i tt-yuklalen. Ad d-nemmeslay dɣa ɣef tddukkla tadelsant n yimaziɣen n Biljik i yennumen leqdic ɣef wayen yeqqnen merra ɣer tmaziɣt, am yidles, amezruy d tutlayt. Tikkelt-a ihi am teɛwaydit n yal aseggas, tga ass n ssebt yezrin yiwet n tmeɣra n ccna, deg temdint n Bruksel, akked sin n yicennayen n tezlit taqbaylit: Racid Ɛelwi d Ɛmiruc Abella. Aṭas n lɣaci i ruḥen ḥeḍren ttiɛad-nni, mačči akken ad zhun, maca ran ula d nutni ad kkin deg tejmilt n usmekti n yimeɣnasen n 1980 d 2001. « S lqerḥ i d-nesmektay iseflan n tefsutin n 1980 d 2001. Nga tameɣra n ccna acku d tin i asen-iɛeǧben i Yimaziɣen yettidiren di Biljik, maca iban nxeddem ula d leqdicat-nniḍen yexḍan ccna ». I d-yenna Mass Crif Ḥamdis, aselway n tddukkla Tadelsant n Yimaziɣen n Biljik. Ad d-nesmekti kan d akken uṭṭun wis 91 n tesɣunt Tiziri i d-tessufuɣ tddukkla Tadelsant n Yimaziɣen n Biljik yal akraḍyur, yeffeɣ-d deg ddurt tamezwarut n wayyur-a n yebrir.

Kaissa Khalifi

- PUBLICITÉ -