Deg wussan-agi kan yezrin, i d-tefka tneɣlaft n Usegmi aɣelnaw Massa Nouria Benghabrit, deg tansa (le site) n tneɣlaft-is leğrida n yikayaden unṣiben n taggara n useggas-agi aɣurbiz 2017 / 2018. Akayad n 5e akked wid n BEM ad d-ilin deg waggur n Ṛemḍan, ma d win n BAC ad d-yili deffir-s kan. Annect-agi yusa-d mebɛed mi temcawer tneɣlaft-agi akked d yinelmaden d yiselmaden ɣef wazemz n ukayad n BAC. Ineggura-a, fernen ad d-yili deffir waggur n Ṛemḍan. Ha-ten-in amek ara d-asen: akayad n taggara n uswir amenzu 5e, ad d-yili ass n larebɛa 23 deg waggur n maggu (23/05/2018). Ma d win n taggara n uswir n ulmud alemmas, yettwassnen s yisem n BEM, ad d-yili seg wass n letnayen 28 alamma d ass n larebɛa 30 seg waggur yunyu (28-29-30/05/2018). Ma d win n taggara n uswir n tsenawit neɣ ayen iwumi qqaren BAC, ad d-yili seg wass larebɛa 20 yunyu arma d ass letnayen 25 deg waggur n yunyu (20-21-23-24-25/06/2018). Ayen yerzan ikayaden n 5e akked BEM, akken i tent-id-summer tikkelt tamezwarut i qqimen, ur ibeddel ara wazemz-nsen. Ikayaden-agi deg sin yid-sen, ad ten-sɛeddin yinelmaden deg waggur n Remḍan, ma d akayad n BAC ad t-sɛeddin yinelmaden kra wussan kan deffir lɛid tameẓyant. Ad d-nesmekti kan, belli akayad n waddal ama d win BEM neɣ d win BAC, ad t-sεeddin yinelmaden deg yiɣerbazen-nsen am yiseggasen i iɛeddan. Akayad-a, ad d-yili gar talemmast n waggur n meɣres d tazwara n waggur n yebrir n useggas i d-iteddun. Ad nesmekti d akken akayad n taggara n uswir amenzu 5e n useggas aɣurbiz 2017/2018, ad t-sεeddin yinelmaden deg yiɣerbazen-nsen, mebla ma rzan ɣer yiɣerbazen-nniḍen, am wakken xedmen deg sin n yiseggasen-agi yezrin.
Gh. A.