Sendiḍelli n ssebt 28 yebrir 2018, i d as-tuɣal tejmilt meqqren i ucennay ameqqran Belɛid At Mejqan yettwassnen s yisem n unaẓur “Belɛid tagrawla”, deg uxxam n yidles Mulud Mɛemmeri n Tizi Uzzu. Tebda tejmilt-agi, ɣef 9h00 n ssbeḥ s snat n temsikniyin, yiwet ɣef umecwar-is di tẓuri akked tudert-is, ma d tis snat n wayen yettwarun fell-as akked ttesawer-is. Ma ɣef 10h00, tella-d talilt “Anza” n uxxam n yidles i d-yecnan kra n cnawi d tezlatin. Syin akkin yella-d umeslay sɣur yimsuddsen n leqdic-agi, gar-asen tanemhalt n yidles n lwilaya n Tizi Uzzu, aselway n tiddukkla tdelsant “Tafat n usirem”, imeddukkal d yiqriben n unaẓur Belɛid At Mejqan, aselway n tɣiwant…atg.Ɣef 11h00 n uzal, yella-d usenɛet n yiwen usaru ameẓyan, i d-yewwin awal ɣef tudert d umecwar n ucennay ameqqran i d-tefka taddart n “Taddart ufella” deg tɣiwant n At Umalu. Deg tmeddit n wass, yella-d deg-s seg 13h00 alamma d 16h00 n tmeddit, tmeɣra n ccna sɣur ddeqs n yicennayen iqbayliyen meqqren yecban; Ṭaleb Ṭaher, Ali Meẓyan, Rabeḥ u Ferḥat, Ǧamel Kalun, Malek Bacci, Amar Ṣerṣur, Yusef Gerbas, Yasine Zawi…atg. Tin ɣur-s, ɣef 16h30 yella-d ufraq n yigerdasen d yiselkinen n usebɣes d wakas (reconnaissance), i lmend n wayen i d-yefka ucennay-agi i tezlit taqbaylit. Ma seg seg 17h00 d afella, tella-d tesfugla n taggara n tejmilt-agi meqqren i ucennay meqqren yecban Belɛid Tagrawla. Ha-t-an d acu i d-yenna Mass Belaid At Mejqan i uɣmis ɣef tejmilt-a i d as-yuɣalen : “Ad snemreɣ aṭas tiddukkla Tafat n Taddart Oufella ɣef tejmilt-agi. Deg tazwara ur zriɣ ara belli ttheggin-d leqdic-a, d ayen i yi-yesferḥen nezzah. Ḥulfaɣ s yiseɣ ɣer warrac n taddart-iw, yal ass taddart tettnerni, tajmilt ad tuɣal i yilmeẓyen-nneɣ i yeẓran d akken ulac tamurt-nniḍen am tmurt-nsen .”
A.A/S.Y.