Amussu addukklan adelsan n temdint n Uqbu, s tallelt n useqqamu aɣerfan aɣiwan n Uqbu, suddsen-d yiwen leqdic adelsan anesbaɣur. Ad d-yili d tajmilt i umeɣnas n tmaziɣt i iruḥen d asfel fell-as. Ad yeddu ttiɛad-a, ɣef teɣzi n tlata wussan, ad yebdu azekka n ttlata 22 maggu 2018, ad yessali ass n lexmis 24 deg waggur-agi ideg nella. I uzekka tasebḥit, ɣef 09h00 n ssbeḥ, yetturaǧu ad tili timlilit deg ubraḥ n tɣiwant n Uqbu, syin ɣur-s d tirza ɣer tmeqbert n taddart Tefrit, ideg ara d-yili usrusu n tmeqqunt n yijeǧǧigen ɣef uẓekka n Masin Harun. Ma ɣef 10h30 n ssbeḥ, ad tili tulya tunṣibt n ubraḥ yewwin isem-is, wa ad yili usebded n usebdad n tektut, ara yettwasbedden deg tlemmast n temdint-a n Uqbu. Syin akkin, ɣef 21h00 n yiḍ, ad d-ilint waṭas n tanagiyin ɣef tudert d wayen yexdem mass Masin Harun. Ma i selazekka n larebɛa 23 maggu 2018, yetturaǧu ad d-yili ɣef 21h00 n yiḍ d tasawent, usarag ara d-yawin awal ɣef umezruy n Umussu adelsan amaziɣ, d wazal ameqqran yesɛa deg-s umeɣnas Harun Massin. Ass n lexmis 24 maggu 2018, ɣef lewhi n 21h00 n yiḍ, yetturaǧu diɣ ad tili tmeɣra n ccna deg ubraḥ n tɣiwant n Uqbu. D tameɣra ideg ara ccnun ddeqs n yifennanen.
Ghani Amazigh