I lmend n usmekti n wass agraɣlan n ugrud, i d-yettilin yal aseggas deg umenzu n waggur n yunyu, tessuddes-d Tenmehla n yidles n lwilaya n Tizi Uzzu yiwen wahil s wazal-is ɣef, teɣzi n tlata wussan.
Yebda leqdic-agi-nsen, ass-nni lexmis 31 deg waggur n maggu, ɣef 21h30 n yiḍ deg umraḥ n tenmeḥla n yidles n Tizi Uzzu. Ma ɣef 22h00 n yiḍ, bdan leqdicat-agi s wudem unṣib, deg unnar Oukil Ramdane. Dinna i d-tella tmeɣra n ccna akked ugraw n Amaḍal Kids, i d-yewwin kra n tezlatin ɣef ugrud d wayen i icudden akk ɣur-s. Yella-d yimṣeḍsi i d-iṣeḍsen igerdan akk yellan dinna. Ma ɣef 00h00 n yiḍ, yella-d umagger n umenzu n yunyu s tumert d teḍṣa. Ma d ahil n wass-nni n lǧemɛa amenzu yunyu, yebḍa ɣef sin n yimukan. Deg Uxxam n yidles Mulud Mɛemmeri, tella-d temsikent n wayen yerzan agrud s umata. Deg umḍiq n yisikwan, si 10h00 armi d 12h00, llan-d 3 n yisikwan; yiwen n usuneɣ, wayeḍ useɣmi (coloraige) akked win n yimuhal n ufus. Ma deg yiḍ, bdan ɣef 22h00, sulin ɣef 00h00 n yiḍ. Fursen yigerdan atekki-nsen deg 8 n yisikwan i d-yellan. Llan wid ixedmen uraren n usegmi, kra d asikew n twennaḍt, wiyaḍ d asikew n tussnaggurt (Astronomie) i xtaren…atg. Am wakken daɣen i d-tella temsizzelt n temseɛraq d teqnaẓ. Ayen yerzan ahil n Tneḍfart n uxxam n yidles Mulud Mɛemmeri n Azazga, yella-d akka. Tella-d temsikent n wayen i icudden ɣer ugrud s umata. Deg umḍiq n yisikwan, si 09h00 armi d 13h00, llan-d 4 n yisikwan; yiwen n usuneɣ, wayeḍ n wuraren n usegmi, wayeḍ n leḥsab akked win n yimuhal n ufus. Ma deg yiḍ, deg tzeqqa n yisihar, llan-d snat n temliliyin. Tmezwarut sɣur useḥḥar Ben Hamou, tis snat sɣur tarbaɛt Amaḍal Kids n Tizi Uzzu. Ahil n sendiḍelli n ssebt 2 yunyu 2018, yella-d d uzzig i temkerḍit tagejdant n tɣuri taɣerfant. Aṭas n temsikniyin i yellan di ttiɛad, ama d tid n temkerḍit-a ama d tid n tddukkliwin-nniḍen yecban “Sos Enfant” . Am wakken daɣen i d-llan waṭas n yisikwa, gar-awen winna n tulsa n tmacahut s teqbaylit akked winna n yimuhal n ufus. Tella-d diɣ temsizzelt n usuneɣ sɣur tiddukkla “Sos Enfant”. Mebla ma nettu imseḍsi-nni i d-yernan ccbaḥa i tmeɣra-agi n ugrud, ulac deg-sen win ur neḍṣi ula yiwen ubrid.
Ghani Amazigh
… Ula deg Tḥanut smektan-t-id…
Ula d aɣerbaz amenzu Hacmi d warraw-is n taddart n Tḥanut, deg tɣiwant n At Ɛissa Mimun, yella deg ttiɛad. Yella-d usmekti-ines swaṭas n yirmad d leqdicat idelsanen, i d-yettwaxdamen sɣur tedbelt n uɣerbaz-a s tallelt n tddukkla tadelsant-timettit “Imar n tdukli’’ n tama-a. Ahil n usfugel-agi, yebda ɣef 8h30 s snat n temsikniyin ɣef yizefan n ugrud deg tudert-is. Syin akin, llan wid ixedmen asuneɣ akked useɣmi, llan wid i xedmen tazabut s tlata n tutlayin: Tamaziɣt, Tafransist akked Taɛrabt. wiyaḍ xedmen timsizzelt n yidles amatu. Mi kfan isikwan-agi-nsen, fɣen-d yigerdan ɣer umraḥ n uɣerbaz. yal yiwen deg-sen yurar 5 n wuraren. Deffir kan wuraren-agi, tella-d Ṭumbula, anida i d-kksen 9 n warrazen n wid yesɛan zzher. Syin akkin yella-d diɣ usikew n temseɛraq s tlata tutlayin-agi: Tafransist, Tamaziɣt akked Taɛrabt. Mi ssulin akk, tella talilt i d-yecnan kra n tezlatin s teqbaylit akked ufraq n 12 n warrazen ɣef yinelmaden i d-yufraren deg yal asikew.
A. A
… yella-d deg Tewrirt Meqqran
Am wakken i yesfugel umaḍal merra ass agraɣlan n ugrud, ihi ula tiddukkla tadelsant Union des étudiants n taddart n Tewrirt Muqqran s lewɛawna n ugraw imnayen ur zgilent ara ula d nutni tagnit akken ad d-mmektin agrud. Heggan-d yiwen n wahil i lmend n tmeɣra-a. Yebda leqdic tasebḥit n lǧemɛa s usuneɣ n tfelwiyin sɣur yigurdan. Syin ɣef 11, tella-d yiwet n tesɣert tamensayt, anda lsan yigurdan lbus imensayen. Syin yekfa wahil n tsebḥit s wuraren n waddal. Ma yella d ahil n tmeddit d yebda ɣef 21h s tmeɣra, syin tella-d tmezgunt yesseḍsayen ( sketch) n ugraw « imnayen ». Ula d ccna, fkan-as azal deg wahil, imi ad tecnu terbaɛt n warrac n tddukkla. Akken daɣen ad d-snaɛten asaru aqbayli Lewhama. Ad ilin ula d isefra. Deg taggara, ad tfak tmeɣra s yiwet n tmezgunt » Ur tessufuɣ sani , nekra » . Seg tama-s aselway n tddukkla Mass Zeggar Malek yenna-d : « Nhegga-d leqdic-a akked ugraw n yimnayen ilmend n wass agraɣlan n ugrud akken ad d-nini belli agrud yesɛa azal deg tmetti, acku d netta i d azekka-nneɣ. Ihi, ilaq fell-aɣ ad t-nheggi ass-a , ilaq fell-aɣ ad as-nerr u ad as-nexdem can « .
Yamani Souhila