Accueil Tamazight Yennulfa-d uɣerbaz s wudem-nniḍen!

Lberj n Mira : Yennulfa-d uɣerbaz s wudem-nniḍen!

774
- PUBLICITÉ -

D ayen yelhan wayen i d-yellan d amaynut, ussan-a kan yezrin, deg tɣiwant n Tsexriwt i d-yezgan deg usamar-anẓul n Bgayet, s lqidar n 60 n yikilumitren. D aɣerbaz d amaynut, s wudem-nniḍen, i d-ilulen sɣur yiwet n terbaɛt i yebɣan ad teqdec i ubaɣur n tmetti s umata, ad d-tawi ajdid i tneflit n temnaḍt. Yerza uɣerbaz-a arrac imecṭaḥ i yesɛan gar 5 d 6 n yiseggasen. Deg-s ad d-yettili ama d arebbi d tɛessast n yiqruren yesɛan seg kraḍ n wayyuren alamma d kraḍ n yiseggasen di leɛmer, ama d tibḥirt n yigerdan n 3 armi 5 n yiseggasen. Ɣas ma werɛad yewweḍ yisalli ɣur yakk imezaɣ n Tsexriwt, aya d ttawil yelhan i nutni d warraw-nsen. Ula deg tɣiwant n Ayt Smaɛel, i yellan yuɣ lḥal d taǧaret n tɣiwant-a n Tsexriwt, bdan tura lɣaci ttmesteqsayen ɣef usenfar-a, bɣan ad ẓren ugar fell-as. Ladɣa ayen ilaqen akken ad yessekcem yiwen mmi-s dinna, neɣ acḥal i ilaqen d tadrimt. Imi ad d-nesmekti d akken ur d-rsen ara ar tura yisallen-a. Yessefk kan ɣef win terza temsalt, ad iqerreb ɣer tensa n uɣerbaz-a, i d-yezgan deg Lberj n Mira, ul n tɣiwant n Tsexriwt. « Ixus-aɣ usenfar-a seg wacḥal-aya. Ad nesɛu ula d nekni di temnaḍt-nneɣ aɣerbaz n yiqruren d yigerdan. Mačči alamma nɛedda i Uweqqas neɣ i Bgayet ara naf anda njerred tarwa-nneɣ ». I d-yenna yiwen n ubabat. Ulac win izemren ihi ad d-yini mačči d ayen n lɛali ara yilin seld asnulfu n tekti-a. Imi arrac iban ad d-ffɣen s wugar n tegzi ma ttwasselmaden zik. Dɣa ula d yiwet n tmeṭṭut seg Ayt Smaɛel tefka-d rray-is s waṭas n tumert. « D ayen igerrzen ayendin uɣerbaz-a amaynut. Tuɣ tilawin iqeddcen berra ḥeslent amek ara xedment d yiqruren-nsent. Llant ttxellisent taxeddamt s wayyur i waya. Ma d tura a-t-an yennulfa-d uɣerbaz iwulmen,

- PUBLICITÉ -

rnu yeqreb ».

Kaissa Khalifi

- PUBLICITÉ -