Akken ad teddu deg ubrid n wahil-is i d-tga taggara-a, thegga-d, ddurt-a iɛeddan, tddukkla tadelsant Itri n Ugeryun n Tsexriwt kra n warmuden (activités) idelsanen seg 21:00 d asawen. Gar-asen dɣa, yella-d usarag-is wis kraḍ segmi i as-tekker i teɣlust taseklant deg temnaḍt. D taɣiwant n Tsexriwt i d-yezgan s wazal n 60 n yikilumitren ɣer Usamar-anẓul n waɣir n Bgayet. D Mass Buzid Bumezwed i d-yettwaɛerḍen tikkelt-a i usarag, ideg i d-yewwi awal abeɛda ɣef « Iɣẓer n Ugeryun ddaw temhersa tafransist ». Deg wakud i yekka usarag-a, i yemmugen deg unammas adelsan n Lberj n Mira, yessefti umsarag (conférencier) akken yessefk awal lwaḥi d uzayez i yenwan ad yeḥḍer. Ulamma ahat mačči aṭas n yimezdaɣ i d-yettarran ddhen-nsen ar tura i yisaragen i d-suddusen, maca s wis kraḍ-a, ẓran yiɛeggalen n tddukkla aql-iten deg ubrid i d-nejren si tazwara. Ad sḍefren asarag-a s wayeḍ, alamma i d-jebden ugar n lɣaci, imi d win i d iswi-nsen. Ɣer tama n umezgun, iwumu ssawalen Yemma-s n tẓuriwin, tessuddes-d daɣ tddukkla-a iɣef nettmeslay, asenɛet n yiwet n tceqquft n umezgun s uzwel n « Tayri d udrim ». D taceqquft i d-tewwi terbaɛt Sin n Sḍisat, i d-yusan seg tama n Tezmalt. Yura taceqquft-a Mass Ǧamal Yasad, yesres-itt-id Mass Tariq Benḥamuc. Akkin i wussan yezrin, ad d-nesmekti d akken thegga-d tddukkla yiwen n umunulug i d-yesken Mass Nadir Belluz. Ayendin n medden i yerzan ass-nni, ɛawzen deg unnecraḥ.
M. K.