Azekka n ttlata 19 yunyu 2018, ara tebdu temlilit tagraɣlant ara d-yilin d tajmilt i yiwet gar tgejda n tezlit taqbaylit. I lmend n usmekti n umulli wis 20 ɣef tmenɣiwt n umedyaz d ucennay neɣ anaẓur aqbayli amḥaddi Lwennas Matub.
Thegga-d tesdawit Abderrhmane Mira n Bgayet yiwet n temlilit tussnant tagraɣlant, ara yeddun ɣef teɣzi n tlata wussan-agi: ttlata 19, larebɛa 20 akked lexmis 21 deg waggur n yunyu ideg nella. D timlilit ara d-yawin awal ɣef tudert neɣ tameddurt n Lwennas Matub, gar tnagiyin d temsal yerzan timeɣnest-ines ɣef tmagit d yidles amaziɣ akked yizerfan n umdan. Ad ilin daɣen yisaragen ɣef tmedyazt-is d yisefra-s, ama s tezrawin n unadi neɣ s tselḍin n yimusnawen n tmedyazt. Am wakken diɣ ara d-ilin yisaragen ɣef uẓawan akked ccna n uḥeddad n wawal-agi aqbayli, yefkan tudert-is d yiman-is d asfel ɣef tmurt n Leqbayel. D tasga n tutlayt d yidles n tmaziɣt akked tmezdayt n tsekliwin d tutlayin n tesdawit n Bgayet d idisan i d-yessuddsen temlilit-agi tameqqrant ara d-yilin deg tzeqqa n yisaragen n tesdawit Abderrhmane Mira n lwilaya n Bgayet, deg tesdawit yettwasnen s yisem n Abudaw. Yetturaǧu ad ḥedren timlilit-agi waṭas n yiselmaden, ad naf tuget deg-sen d iselmaden deg tesdawiyin n tmurt n Lezzayer, gar-asen Kamel Bouamara, Allaoua Rabhi, Mohammed Djellaoui, Mohand Akli Salhi, Saɛid Chemakh…atg. Llan daɣen yiselmaden n tesdawiyin n tmura tiberraniyin, gar-asen: Kamel Nait Zerrad, Tassadit Yacine, El Husscina Farhad…atg. Ma d iswi n temlilit-agi, ɣef wakken i t-id-nnan yimsuddsen-agi deg wulɣu-nni n temlilit-a, ad yili d asissen iwatan ɣef wayen akk i d-yefka d wayen i d-yeǧǧa Matub ama d tamedyazt, ama d aẓawan ama d isental iɣef yessefra akked talɣiwin swayes yessefra…atg. D tagnit ara d-yesddukklen imussnawen d yiselmaden d wid akk iḥemmlen Lwennas, d tagnit daɣen n tmussni d tussna, imi ad yili ubeddel n tmuɣliwin d tmussniwin ɣef urgaz-agi ameqqran. Tger-d Massa Lynda Ouatah, s yisem-is d taɣellayt n ugezdu n tmaziɣt n tesdawit-agi, tiɣri i yinelmaden d yimdanen iḥemmlen azamul n tezlit taqbayli Lewnas Matub i wakken ad d-rzun akk ɣef tezɣi n tlata wussan-agi, i wakken ad as-rren ula d nutni tajmilt, wa ad ḥedren timlilit-agi ara asen-d-yawin aṭas n tmussniwin yeffren deg umedyaz-acennay Matub.
Adaoun Abdelghani