Accueil Tamazight Zrin 20 n yiseggasen neɣ 20 n wussan?

Asmekti n tmenɣiwt n Lwennas Maɛtub : Zrin 20 n yiseggasen neɣ 20 n wussan?

1149
- PUBLICITÉ -

Ass n 25 yunyu 1998, d azemz i iresxen i lebda deg uqerruy n yal azwaw. Ass-nni, mi d-yuɣal Lwennas Meɛtub seg yiwen n usečču di Tizi Uzzu, ɛewwlen kra n yimcumen ad as-d-sɣimen di Tala Bunan.

- PUBLICITÉ -

Wwten-t s wacḥal d tarsast, armi i t-nɣan. Seg wass-nni, neḥsa kan d imesbaṭliyen i t-yenɣan, maca d anwa-ten? Ur iban ar tura. D acu, mazal tidet n tmenɣiwt n unaẓur Lwennas Meɛtub, ass-nni n lexmis, tettezzi akka d wakka deg yigenwan n yidurar. Mazal anza-s i d-ilulen ass-nni di terga, akken i t-id-yenna, yessawal-aɣ-d seg yal tama. Yefren uɣewwaɣ ad yeɣli d argaz ilelli, ad yemmet ɣef tektiwin-is, wala ad yedder war amenzay neɣ s uzaglu ɣef yiri. Ur tban tidet ɣef tmettant-is, maca tettbin-d akken-nniḍen. Ma yella tettbin-d d anza-s i aɣ-tt-id-yesbanen, d awalen-is i aɣ-d-yemlan. Neẓra d anwi-ten yiɛdawen-is, neẓra d anwi i t-iɛuffen, neẓra d acu i aɣ-d-yecna. Deg tidet, asmi ɣilen nɣan-t, ass-nni i t-id-slulen. Imi seg useggas ɣer wayeḍ, yettaweɣ ugar deg tudert, deg wulawen, deg tmura. Acḥal dɣa i irezzun fell-as yal aseggas ɣer Tewrirt Musa anda yesteɛfa, acḥal ara yerzun fell-as ass-a, deg-s ad as-inin aql-aɣ deg ubrid-ik, deg-s ad ttrun akked Nna Ɛeljiya imeṭṭi n usmekti n tixsi i nɣan yidammen-is. Kra n win yerzan fell-as deg uẓekka-s, yewwi-d yid-s ameslay abaṭniw. Seg wakken meqqer uḥulfu, yal yiwen yettḥulfu s wayeḍ, yal yiwen isell i wayeḍ. Mi nwala i uwitay (calendrier), nufa ziɣ 20 n yiseggasen i yezrin ɣef tmenɣiwt-is, maca ɣur-neɣ ad as-tiniḍ d 20 n wussan. Leɣrur n wakud d tatut akk i yettrebbi deg wallaɣen, ur sɛin amkan tama n wanza n Lwennas Meɛtub. Daymi mazal ad yedder d tisuta umdan-a igerrzen. Ass-a, ula d agrud i d-ilulen ass mi yettwaɣḍel, yettḥulfu yessen-it, yeẓra-t, imi ur yeǧǧi ayen ur d-yenni s tezlatin-is. Kkes-d amek ur yessaki, ur iwessa neɣ ur iwanes. Ur nezmir ad d-nini ma ahat Lwennas Meɛtub yumer deg uẓekka-s s cwiṭ i d-nḥella, neɣ yeḥzen s zzhir akk i d-ileḥqen ifetti deg yal tamnaḍt. Neẓra kan iwessa-aɣ ɣef uzbu (résistance), aql-aɣ nzebbu.

M. K.

- PUBLICITÉ -