Ass-nni n letnayen yezrin 30 yunyu 2018, i d-tessuffeɣ tesbeddit Takanadit tamaziɣt “Tiregwa” ulɣu anda i d-tefka ismawen n wid i d-yufraren deg sin warrazen n tsekla (Rachid Aliche i wungal akked Belaid Ait Ali i tullist). Semmus n yimura n tmurt n Leqbayel i d-yufraren deg temsizzelt-agi n tsekla i useggas 2017/2018. Arraz n Belaid Ait Ali n tullist, deg tezrigt-is tis xemsa, ufrarent-d tlata n tullisin. Arraz amezwaru, yuɣal i umaru Larbi Yahioun, s tullist-is “Tudert-nniḍen”. Ma d arraz wis sin tewwi-t, Massa Bellal Tilelleli s tullist-is “Tayri n Facebook”. D igli n tlelli, i yewwin arraz wis kraḍ s tullist-is “Rsen-d s yigenni”. Ma d arraz n Rachid Alliche i wungal ifazen, di tezrigt n useggas-a, yuɣal i uneggal ilemẓi Hocine Louni. D ungal-is wis sin “Asebbaɣ” swayes i d-yufrar deg temsizzelt-agi n tsekla, i d-tettheggi yal aseggas tesbeddit-agi. Ad nesmekti kan belli, arraz-agi n Rachid Alliche i wungal ifazen, yebda deg useggas n 2014. D Amar Mezdad i t-yewwin tikkelt tamezwarut, syin d Amer Ulamara, deffir s d Salem Zenia. Ma di tezrigt-agi taneggarut, yufrar-d deg-s Hocine Louni. Ma d arraz n Belaid Ait Ali i tullist ifazen, yebda deg useggas n 2012, tura akka yewweḍ ɣer tezrigt tis semmuset. Ma d iswi n temsizzelt-agi, ɣef wakken i t-id-nnan yimsuddsen n tezrigt-agi: “Asebɣes i yimura-nneɣ yettarun s teqbaylit akked usebɣes daɣen n usnulfu di tsekla taqaylit”.
Ghani Amazigh