Accueil Tamazight Asnulfu n uɣerbaz aɛlayan n tusnakt

Amizur : Asnulfu n uɣerbaz aɛlayan n tusnakt

1329
- PUBLICITÉ -

Yennulfa-d ussan-a kan, deg ukampus n Amizur, umaynut i llan ttraǧun ddeqs n yinelmaden i iẓewren deg tɣuri, abeɛda deg tusnakt. Wagi ihi d aɣerbaz afellay n tusnakt, ara yebdun asnubget n yinelmaden deg unekcum asdawan i d-iteddun 2018-2019. Ad d-nesmekti d akken aberreḥ s waya yella-d seg yimi n uneɣlaf , Mass Taher Ḥeǧǧar, i lmend n teldayt n yiqeddicen n uswir wis 70 n Tesseqamut tagraɣlant i tezrawt d uwenneɛ n uselmed n tusnakt. Yemmeslay-d dɣa ɣef uɣerbaz-a ajdid, ayen akk yellan deffir usnulfu-ines, d yiswan i d-gan wid i d-yeslalen asenfar. Ɣef wawal-is, aɣerbaz am akken d tajmilt neɣ d asṭeɛref i waɣir n Bgayet, imi yeqqen ayendin umezruy-is ɣer tussna s umata akked tin n tusnakt abeɛda. Aya yesmektay-d ladɣa leqrun imenza d yilemmasen seld talalit n Sidi-tneɣ Ɛisa. Si tama-nniḍen, yebder-d Mass aneɣlaf tiririt i tiɣri n yinelmaden d yiselmaden deg uḥric-a n tussna, i yessaramen seg wacḥal-aya tura ad d-yili usenfar-a n uɣerbaz n tusnakt. Ma nwala ihi, d ayen ara yeldin tiwwura timaynutin i wid yebɣan ad farsen tamussni d tikci-nsen deg ubeggen n tzemmar-nsen d usnerni n tusnakt deg Bgayet tugart tugart. Ɣef waya dɣa, deg wayen yerzan afran n twilayt n Bgayet akken ad yettwasbedd uɣerbaz, iwekked-d uneɣlaf belli yeqqen waya i kra n leḥsabat n tura d wid umezruy aqbur. Imi, akken i d-yenna, aṭas n yisdawanen i d-yettarran ɣer Bgayet i unadi n ḥawla n tẓuriwin d tussniwin, gar-asent tusnakt. Yewwi-d amedya n Uṭalyan Léonardo de Pise, i yellan d aselmad n tusnakt, maca daɣen i d-yufan deg Bgayet i tikkelt tamezwarut asiḍen akked yimḍanen. Ad d-nerr kan awellih belli ur iban lasel n tidet n yimḍanen-a, imi llan qqaren-d d izwawen, llan qqaren-d iɛraben. Yessefreḥ ayendin isalli-a inelmaden i yeṭṭafaren taɣult-a n tusnakt, imi llan d isnawanen maca ferḥen i wayen ten-yettraǧun mi ara smurrsen deg ukayad n BAC. « Mazal beɛdeɣ cwiṭ si tesdawit, imi aql-i deg useggas wis sin di tesnawit. Maca imi ḥemmleɣ tusnakt, ssarameɣ ad snernayeɣ aswir-iw akken ad sawḍeɣ ad kecmeɣ deg uɣerbaz aɛlayan n tusnakt n Amizur ». I d-yenna yiwen n yilemẓi. Yewwi-d awal uneɣlaf ula ɣef tikkin n Lezzayer n tura, neɣ n Tmazɣa talemmast, deg usissen n tusnakt di Turuft d umaḍal s umata.

- PUBLICITÉ -

M. K.

- PUBLICITÉ -