Ass n lexmis, 19-07-2018, ɣef 20h00 n yiḍ, i d-bannen yigemmaḍ n ukayad n taggara n uswir n tesnawit yettwassnen s yisem n (BAC) n useggas aɣurbiz 2017-2018. Alaḥsab n tenmehla n usegmi n lwilaya n Tizi Uzzu, azal n 12 918 n yimsizwren, i yejerden iman-nsen deg umuɣen n usεeddi n ukayad-a, maca ala 12 673 i t-isɛeddan. Leḥsab n wid i t-id-yewwin yelḥaq 8 767 s lqidar n 69, 18%, s wakka i d-tḥella amkan amezwaru deg umyezwar deg wakal aɣelnaw i tikkelt tis mraw d yiwen 10, imi seg useggas n 2008 d netta dimma i d-yettifriren. Am yal aseggas, d tullas i d-yettifriren ɣef warrac, imi lqidar n tid i t-id-yewwin yewweḍ ɣer 73,09 % ma d win n warrac, yewweḍ ɣer 63,49%. Deg umyezwar n yinelmaden, ad naf deg umḍiq yuɣal i tnelmadt Kebaili Lina, yeqqaren deg tesnawit n Dahmani Mohamed n temdint n Boghni, s tneqiṭ n 18, 68/20. Ma d amḍiq wis sin tḥerra-t-id tnelmadt Belkacem Lina, yeqqaren deg tesnawit Fadhma N’soumer n Tizi Uzzu, s tenqiṭ n 18, 17/20. Amḍiq wis kraḍ n umyezwar yeṭṭef-it unelmad Amine Ouahab, yeqqaren deg tesnawit n Laadlani Mohmed n Maatkas, yewwi-d akayad-agi s 18,12/20. Ma d inelmaden i yewwin ugar n 18/20, wwḍen ɣer 08 n yinelmaden, ma d uṭṭun n wid i d-yewwin ugar n 17/20 yelḥeqq 71. Am wakken daɣen i d-wwin wazal n 257 n yinelmaden tazmilt yugaren 16/20, ma d 553 n yinelmaden-nniḍen wwin-d ugar n 15/20. Ma deg wayen yeεnan amyezwar n tesnawiyin: d tasnawit n Amar Toumi n Tigzirt i yewwin amkan amezwaru s wazal n 94, 33%, ma d amḍiq wis sin, tewwit tesnawit n Beni Zmenzer yellan deg Wat Dwala s lqidar n 89 77%, i yeṭṭfen amḍig-agi deg BAC n useggas iɛeddan. ma d tasnawit Mohamed Said Diouani n Makouda, I yewwin ilindi amḍiq amezwar, aseggas tḥela-d amḍiq wis kraḍ, s wazal n 89,22%. Ad d-nesmekti belli, ula deg ukayad n taggara n uswir amenzu (5°) akked win n taggara n uswir alemmas (BEM) d lwilaya n Tizi Uzzu i d-yufraren deg tqacuct n umḥezwar.
A. A.