Yessufeɣ-d ussan-a iɛeddan umaru Yusef Zirem adlis wayeḍ i yura ɣef uɣewwaɣ Lwennas Meɛtub am wakken i t-id-yeqqar dɣa uzwel-is: « Matoub Lounes, la fin tragique d’un poète ». Yeffeɣ-d udlis-a di tmurt n Fransa ass n 14 yunyu yezrin, ɣer tezrigin Fauves Editions. Dɣa, yedda-d deg-s abeɛda umeslay ɣef umecwar n umedyaz, ɣef umennuɣ-is d tmenɣiwt-ines ass n 25 yunyu 1998. Ɣef wawal n umeskar, ad naf deg udlis-a, ugar n tmeddurt yettwafesslen n Lwennas At Lewnis, aṭas n tɣawsiwin-nniḍen werǧin ttwannant-d deg wayen iɛeddan. « Aqeddic-a, tazwara d tajmilt i yiwen i yefkan tudert-is ɣef yidles. D ameslay ɣef umecwar-is akked yineḍruyen imeqqranen i yedder. Daɣen d tasleḍt ɣef tmedyazt-is. D tamuɣli ula ɣef ccraɛ n wid i t-yenɣan ur d-nelli ar ass-a ». I aɣ-d-yenna umeskar, Mass Yusef Zirem. Akka tura, yebda yakan umaru adellel d usissen n udlis-is di Fransa, s uheggi n waṭas n temliliyin tiseklanin. Rnu, ayen i d-ijebden awellih, d mi ṭṭuqqten ayendin wid i d-yettasen ɣer ttiɛadat-a iseklanen, ttaɣen adlis-a amaynut ɣef mmi-s n Tewrirt Musa. « (…) Werǧin yettu Lwennas Meɛtub igellilen. Deg tefsut n useggas n 1997, mi d-yekcem ɣer tmurt i kra n wussan, iwala lmeḥnat n yal ass n uɣref. « Mlaleɣ-d dinna taɣlayt n yisafaren d tudert, imdanen ur nezmir ad kksen laẓ i yiman-nsen. Yella kra seg kullec maca s ssuma ɣlayit, ihi ur rzan medden merra. Iɣeblan-a ad ilin deffir waṭas n tɣawsiwin ur nelhi, akked taluft-a n rrebrab i yessidir udabu », i d-yenna s ttbut, i uneɣmas Mestafa Harzun ». Aya d ciṭṭuḥ i nezmer ad nɣer seg udlis-a. Ilul Yusef Zirem di Tmurt n leqbayel, aseggas n 1964. D aneɣmas, d amaru i d-yessekren tamrawt n yidlisen ar tura, seg-sen ad d-nebder Les enfants du brouillard (Arrac n wagu), La vie est un grand mensonge (Tudert d tikerkest tameqqrant), Histoire de Kabylie (Amezruy n tmurt n leqbayel), akked l’Homme qui n’avait rien compris (Amdan ur negzi acemma).
M. K.