Seg tikta i d-irezzun s iqerra n medden mi ara yeḥmu lḥal, am wussan-a dɣa, d tirza ɣer teftisin yemgaraden. Deg waɣir n Bgayet, ttwajerraden ayendin d iɛewwamen yal aseggas, i d-yettasen ula seg twilayin-nniḍen, n usamar neɣ n umalu n tmurt, am Seṭṭif, Sirṭa, Tyaret, Lberj Buɛrariǧ d tiyaḍ. Tikwal ula d iberraniyen yella wanida I ttmeẓran deg teftisin n Bgayet. D ayen i yessemɣaren dɣa ula d amxudneq n tikli deg ubrid aɣelnaw wis 9, armi yella wanida ilaq ugar n 4 n yisragen (Horde) akken ad yaweḍ yiwen ɣer Bgayet ma iruḥ si Xerraṭa. Ulamma zik tuɣ ur ttamden sin n yisragen, s umata mi ara yaweḍ. D acu kan, awal ncudd-it tikkelt-a ɣer teftisin n Bgayet d tegnatin ideg i d-ttasen yimerrayen d yiɛewwamen. Ahat ugur amezwaru i d-ttemlalen ibeddu seg uparking anda ara ǧǧen takerrust neɣ d akamyun-nsen. Ɣef wawal n waṭas n medden, aṭas i d-ssuturen wat yiparkingen-a, rnu ur iban akk d anwa-ten neɣ amek qeddcen. Ɣer kra medden, ddaren-ak yezmer ad ilin d tarbaɛt n yibandiyen kan, xeddmen s tuffra, ttfrasen agdud d yimerrayen. Ula d tiddukkla n Bgayet i useḥbiber ɣef wafayen (littoraux), tesḥasef aṭas ɣef temsalt-a, dɣa tessawel-d ussan yezrin i yiwen n unejmuɛ akken kan ad d-sbeggnen urrif-nsen seg wat yiparkingen-a. Akkin i wayen ilezmen di teftist, ttwalin wiyaḍ ɣlay ukray n tɣawsiwin-nniḍen, i ilaqqen ad ilin mi ara qerben madden s aman, yecban: ssiwan, ṭṭabla, ikersiyen, dduzan n turart i warrac… atg. Dɣa ɣef wannect-agi merra, ha-t-an i d-yenna yiwen n yilemẓi i d-yuɣalen si teftist n Melbu : « Simmal yettiwɛir i yal yiwen ad yerzu ɣer teftisin-nneɣ deg unebdu, abeɛda igellilen. Mi rziɣ s tkerrust-iw ssutren-iyi-d kra n yilemẓiyen 150 n yidinaren akken ad gariɣ. Mi ɛeddeɣ ad d-kruɣ ssiwan d ṭṭabla, ttuḥettmeɣ ad xelseɣ 600 n yidinaren. Ahat mačči ɣlay nezzeh, maca yella wanida i d-ssuturen armi d 800 n yidinaren ».
M. K.