Accueil Tamazight Abudali d amaynut n Ɛli Ideflawen

Ajdid deg usizreg : Abudali d amaynut n Ɛli Ideflawen

1299
- PUBLICITÉ -

Yuɣal-d bab n tezlit tamḥaddit Ɛli Ideflawen s walbum n ccna d amaynut ussan iɛeddan, seld lɣiba idumen aṭas n yiseggasen. Dɣa, deg tesfift-a n 2018, i wumi yefka azwel n « Abudali », yewwi-d deg-s sa (7) n tezlatin. Ayen i d-ijebden allaɣ deg-s, imi si tezlit tamezwarut, ideg yerra tajmilt i Muḥend u Yeḥya. Abeɛda deg tazwara n tezlit-agi, anda-ken i d-as-yeqqar: « Uuh! Ass-agi tcudd tyersi. Uuh! Iruḥ Muḥend u Yeḥya ». Ad d-nesmekti belli Ɛli Ideflawen yecna ayendin n yisefra n Muḥend u Yeḥya. Yeqqar-as di tezlit tis snat: « Ɣas tgezmem-iyi ifassen-iw, amer kra ad t-aruɣ. Ɣas tgezmem-iyi iḍarren-iw, amer ɣef tmurt ad lḥuɣ. Ad iyi-d-tegri taɣect-iw, ad cnuɣ ɣef tlelli ». Deg tezlit i tt-id-iḍefren, yella-d umeslay gar ubabat amɣar d tyellit, i as-yessuturen ad as-d-imel ɣef umezruy, ad as-d-yessiwel timucuha n tudert akken ad tefhem tilufa i yerzan tamurt-is. Gar tezlatin i d-yeddan, ad d-naf yuɣal-d daɣen wawal ɣef tlelli i yeɛzizen aṭas ɣef Ɛli Ideflawen, deg tezlit i wumi isemma « Yemma-s d mmi-s ». Gar wayen i d-yellan deg-s d adiwenni s ccna, d uẓawan yelhan, nezmer ad nsel ɣer taggara i: « Ay ameɛzuz-iw a mmi, a win rebbeɣ s ttnefcic. Ulamma kečč ad truḥeḍ, a mmi ḥebbreɣ-ak lɛic. A yemma ɣef tlelli, ma lluẓeɣ ad ččeɣ leḥcic ». Deg tezlit send taneggarut, ad iger yiwen tamawt i uẓawan n Lwennas Meɛtub i yerfed Ɛli Ideflawen akken ad d-yawi tamuɣli tamatut ɣef win i wumi isemma « Abudali ». Ɣer taggara, yefren bab n tezlit « Abrid » ad yekfu tazrart n tezlatin n walbum-a, s tmenna n yiwen n usefru amḥaddi, i yesɛan ayendin d anamek.

- PUBLICITÉ -

M. K.

- PUBLICITÉ -