D tasqamut n taddart n Yiḥiṭussen akked Tiddukkla tadelsant “Sebɛa Zbari” n taddart-agi n Yiḥiṭussen, i d-iheggan tazrigt-agi tis ukkuẓet (4) n tfaska n tmeẓla (la forge), i yeddan ɣef teɣzi n tlata wussan.
Tebda tasebḥit n wass-nni n letnayen 6 deg waggur n ɣuct, tekfa tameddit n wass-nni larebɛa 8 deg waggur-agi ideg nella. Tazrigt-agi tis rebɛa, fkan-as asentel “Tameẓla tamensayt: d tigemmi i usebɣer n tdamsa tamsedrart”. Tafaska-agi, tella-d deg usalay n taddart akked usebdad n yimeɣrasen n tegrawla tazzayrit 1954-1962. Llan-t ddeqs n temsikniyin, yecban, timsikent n wallalen n uḥeddad neɣ n umẓil d usegzi n twuri n yal yiwen seg-sen, sɣur yiḥeddaden n taddart-agi i mazal ṭṭfen deg tefḍisin-nni i d asen-ǧǧan yimawlan-nsen. Am wakken yella deg yinzi. “Yessers uḥeddad tafḍist, irfed-itt mmi-s”. Am wakken daɣen i d-yella umeslay s tewzel ɣef umahil n uḥiṭus, imi qqaren isem n taddart-agi, anamek-ines d iḥeddaden. Mebla ma nettu timsikniyin n lfeṭṭa , n talaɣt, n yidlisen, n tamemt, zzit…atg. Am wakken daɣen i d-llan waṭas n leqdicat, deg tṣebḥit n wass-nni n letnayen, mebɛed tulya tunṣibt n tezrigt-agi tamaynut. Dɣa, ad naf, asersi n tmeqqunt n yijeǧǧigen ɣef usebdad n yimjuhad n taddart d uskan n wamek i d-yettili uxeddim n kra n tɣawsa n tmeẓla. Ma di tmeddit n wass, yella-d usarag n umnadi deg umezruy Mass Zinedine Kacimi n tesdawit n Tubiret, i d-yewwin awal ɣef tmeẓla tamensayt d wayen icudden ɣur-s. Azekka-nni n ttlata 07-08-2018, yella-d diɣ usarag n Mass Arezki Hammoum ɣef useḥbiber ɣef twennaḍt, deg tṣebḥit n wass. Ma di tmeddit, tella-d temsikent n lbus n tlawin n leqbayel (défilé de mode) am wakken diɣ i d-yella wurar n lxalat, sɣur tilawin d telmẓyin n taddart-agi n Yiḥiṭusen. Ma deg yiḍ, d taḍsa d unecreḥ i d-yellan i wat taddart. Ass-nni n larebɛa 08-08-2018, i d-yellan d ass aneggaru n tfaska-agi di tezrigt-is tis rebɛa, yella-d deg-s usiken anaddal (exhibitions sportiives) n waddal n Vo vietnam. Rnu ɣef waya, tasfugla n taggara i d-yella s tmeɣra n ccna meqqren ideg ccnan ddeqs n yicennayen. Ma d iswi deffir leqdic-agi, ɣef wakken i d-nnan, bɣan yimsuddsen n tfaska-agi, ad ṣṣiwḍen taẓuri-agi d umahil-agi i tsutwin timaynutin, i wakken ad ẓren amek tga lxedma n wuzzal, d wamek xeddmen allalen n wuzzal sexdamen yal ass, ama d agelzim, taqabact, afḍis…atg. Ma nuɣal-d ɣer wazal tesɛa tẓuri-agi deg tmetti, ad naf teṭṭef amḍiq d ameqqran, d ayen i d-yettbanen deg waṭas n yinzan, gar-asen: “Xeddmen uzzal mi yeḥma”, yella,diɣ, winna i d-nebder yakan. Tella daɣen tenfalit i d-yekkan seg umahil-agi, daymi qqaren: “Gar ẓẓebra d yifḍisen”.
A.Gh.