Seld ddeqs n wakud d agani, ha-t-an ihi yettwajerred ussan-a uḥric wis sin n ubrid n Tecruft, i yettawin seg tɣiwant n Ayt Smaɛel ɣer Uweqqas, mi ara tɛeddiḍ seg Kefrida. Yusa-d umaynut seg tedrimt i d-ikecmen taɣiwant si tama n Texzant n tmazdagin tidiganin (FCCL), akken yella lḥal ɣur waṭas n tɣiwanin dɣa. Imi send tikci n texzant, yella ur iban melmi ara yettwasemmed uxeddim, neɣ xersum mačči deg useggas-a ideg nella, akken tuɣ tenna-aɣ-d yiwet n teɣbalut seg tɣiwant-a iɣef nettmeslay. « A-t-an nesɛedda-t dayen usenfar-a n ubrid n Tecruft, ara d-yekkren s wazal n 33 n yimelyan idinaren». I aɣ-d-yenna uselway n tɣiwant n Ayt Smaɛel, Mass Sadeq n Ayt Urbaɛ. Send ad aɣ-d-yemmeslay ɣef beddu n yiqeddicen. « Ayen yerzan azemz n useqleɛ n lecɣal deg ubrid-a sɣur tkebbanit ara d-yelhun yis-s, yezmer lḥal ad yili di ṭuber. Lḥasul send ad d-kecmen yigeffuren n Ccetwa », i d-yenna. Iban d ayen i d-igan ayendin d tumert i yimezdaɣ n Ayt Smaɛel, d yinehharen, abeɛda. Imi abrid-a nwan ad t-seqdacen deg wadeg n ubrid aɣelnaw wis 9, akken ad awḍen srid ɣer Aweqqas, s tikkin seg Kefrida. Ugar n cwiṭ n wakud ara d-rebḥen deg tikli-nsen, ad selken xersum seg umxudneq n ubrid-a aɣelnaw, i yettimɣuren yal anebdu. Rnu-as atthenni ara tthennin i kra n wuguren n liḥala n yiberdan, ama d win n Tecruft akken yella tura, neɣ d abrid n twilayt wis 6, i d-yettawin seg Lberj n Mira ɣer Ayt Smaɛel, ɛeddi akkin i Buɛendas. «Aḥric n yiberdan di tɣiwant-nneɣ, ad yernu ad d-yefk udem yelhan mi ara yekfu dayen ubrid n Tecruft. Nekni s yinehharen, nella nḥar ma ɛni d tidet ad d-yuɣal iseggem, ad t-nesseqdac melmi i aɣ-yehwa ». D awal n yiwen n unehhar seg taddart n Ayt Tɛisiwt.
M. K.