Seg yulyu iɛeddan, mi yefra wugur i tuɣ gar wufrinen n Useqqamu aɣerfan aɣiwan, bdan ttbinen-d yiberdan akken ilaq i wid yellan d imḍebbren di tɣiwant n Yiderginen, i yeggugen s wazal n 45 n yikilumitren ɣer usamar n Bgayet. Ula d tuget n yimezdaɣ, i tuɣ snuzgumen ɣef uwḥal n tɣiwant-nsen, suffɣen-d dayen anehhit-nni n utthenni seg umsegraw n ferru i d-yellan. Ad d-nesmekti d akken ufrinen n tɣiwant-a llan ur sawḍen ad mtawan ɣef wamek ara yili uzday n yimeḍqan. Gar FFS, Talai El Huria, d TAJ i d-yennulfa umcebbak, imi ineggura-a, llan ur qbilen annect yefka ikersiyen uselway Racid Xalef i ukabar FFS, ideg i d-ibedd. Dɣa, d wannect i asen-yefka i nutni. Tekka taluft n uwḥal ugar n sa n wayyuren, armi ɣer taggara sawḍen mtawan dayen. « Tura neǧǧa ɣer deffir akk uguren i tuɣ llan gar-aneɣ. Nemsefham seg yimir-nni ad nesseqleɛ lecɣal i lfayda n tɣiwant-nneɣ d tneflit-ines », i aɣ-d-yenna yiwen seg wufrinen n ukabar FFS. Ayen yerzan amek i d-yella umtawa d beṭṭu n yimeḍqan, s uḥḍar n uselway n useqqamu aɣerfan n Bgayet Mass Mhenni Hadadu, yewwi ukabar n FFS 2 n tenmazuliyin (vice-présidences), akabar n TAJ 1 n tenmazulit, win n Talai El Huriya tsaḥ-as-d yiwet daɣen. Tiseqquma, ibedd ukabar n RND ɣef tin n tmetti, win n TAJ yelha-d d tin n tedrimt, win n TH ɣef tin n lebni. Ma yella d taskiwin tideblanin, yesselḥay ukabar n FFS kraḍ (tin n Ayt Ɛnan, Seɛdan, Iɣẓer n Uftis), tin-nniḍen n Tdergunt yeṭṭef-itt ukabar n TAJ. Segmi uɣalen wufrinen, yal yiwen yeṭṭef amḍiq-is deg useqqamu, snagayen akk yimdanen s liḥala yettgerrizen n tɣiwant-a. Ula d aseqleɛ n lecɣal d yisenfaren yemgaraden, yettili-d s wugar n tazzla.
M. K.