Azekka n ttlata 21 ɣuct 2018, d ass amenzu n lɛid tameqqrant i useggas-agi, ma d tasewwiqt, tella-d ass-agi n letnayen 20 ɣuct2018. Ma d ass n tizli ad d-yili azekka n ttlata.
Ass n trezzaf, akken qqaren, ad yili ass wis sin n lɛid ara d-yilin seldazekka n larebɛa-agi sdat-nneɣ. I wakken ad tɛeddi lɛid-agi deg tegnatin iggerzen, yesseḥres uwanek azzayri aqader n kra n yisuḍaf i d-yettwaheggan i lmend n waya. Bdu-tt-id s usekcem n tjerniḍin n wid yeffɣen ɣer tesɣimt uqbel ussan n lɛid. Wid i iwulfen ttwaxlasen gar 20 d 22 n yal aggur, xelṣen-ten ass-nni n ttlata 14 ɣuct, ma d wid yeffɣen ɣer tesɣimt, niqal ttwaxlasen 24 d 26 n yal aggur, maca xelsen-ten ass-nni n larebɛa 15 ɣuct 2018. Ma ɣef tiɣin n yizimer n lɛid, tettberiḥ-d tfidiralit tazzayrit n yimsudren belli “Afran n yikerri yelhan” ha-t-an deg wadgen n tunzut yesɛan asireg. Ala imeḍqan-agi i izemren ad ḍemnen ikerri yelhan i tuččit, imi sɛeddan yakan izamaren-a ɣef umejjay n lmal. Ma si tama n teɣlift n tunzzut, tefka iwellihen i wazal n 51.000 n yimsenziyen deg tmurt merra, ara yellin tiwwura-nsen n tḥuna deg sin wussan-agi n lɛid tameqqrant. Gar-asen 5.506 d lkucat n uɣrum akked 33.013 d imsenziyen n tḥuna n lxeḍra d lfakya. Azal n 11.949 n yimsenziyen-nniḍen, ad ilin i lmendad n leqdicat-nniḍen yemgaraden n tunzzut (leqhawi, tiḥuna n lqqec…) akked wazal n 136 n lluzinat n uyefki d 283 n tesyar…atg. Am wakken ara d-ilin wazal n 2.219 n yimeggan (agents) ara d-yelhin s uraqeb n yimsenziyen i wakken ad tɛeddi deg tegnatin yelhan. Si tama-nniḍen, d tamsulṭa n tmurt ara iḍemmnen taɣlest iwatan ɣef teɣzi n sin wussan-agi n lɛid.
A. Gh.