Yennerna aṭas wuṭṭun n tuddar i yettekkan deg tezrigt-agi tis seddiset (6) n temsizzelt n tezdeg Aissat Rabah n Tizi Uzzu.
Aseggas-a, yewweḍ ɣer 102 n tudrin i issersen zzmamat n uttekki-nsent, yerna s lqidar n 25% ɣef tezrigt-nni n useggas iɛeddan. Bdant ussan-agi iɛeddan tufɣiwin n tesqamut n uktazal n Useqqamu aɣerfan n lwilaya ɣer tudrin yettekkin deg tezrigt-agi tis 6. Yetturaǧu ad tessali axeddim-is deg wussan i d-iteddun. Mebɛed mi d-walan merra tudrin yettekkan, syin ad senqḍen ɣef 100 n tneqqiḍin yal taddart, deffir-s kan ad yili umyezwar n 10 n tuddar ara d-yifriren. Tasfugla n ufraq n warrazen, yetturaǧu ad tili ass n 11 tuber 2018 deg Uxxam n yidles Mulud Mɛemmeri n Tizi Uzzu. Tazrigt-agi tis 6 n temsizzelt-agi n tezdeg, tewwi-d amaynut i useggas-agi n 2018, ideg ara tefk teseqqamut n ufran 10 n warrazen, mačči 8 am useggas iɛeddan, Ad d-sqimen mraw-agi n warrazen s 44 n yimelyan n yidinaren, mačči s 33 n yimelyan am useggas iɛeddan.Taddart ara yawin arraz amezwaru, ad tawi 9 n yimelyan, tis snat ad tawi 7 n yimelyan, tis tlata ad tawi 6 n yimelyan, tis rebɛa ad tt-id-ṣahen 5 n yimelyan, tis xemsa 4 n yimelyan, ma d tin ara yawin arraz wis setta d wis sebɛa akked wis tmanya, ad awint yakk 3 n yimelyan i yal yiwet deg-sent. Ma d taddart ara yeṭṭfen amḍiq wis tesɛa akked wis mraw, ad awint 2 n yimelyan i yal yiwet. Ma d ilugan yessedduyen timsizzelt-agi, ad d-ilin akka-agi: snat-nni n tuddar ara yawin arraz wis 9 d wis 10, sɛant azref ad ttekkint deg tezrigt i d-iteddun, ma d tlata-nni n tuddar ara d-yifriren d timenza, ur sɛant ara lḥeqq ad ttekkint deg temsizzelt-agi alamma ɛeddan xemsa n yiseggasen. Ma d tudrin ara yeṭṭfen amkan wis 4 akked wis 5, ur sɛant ara azref n uttekki alamma zrin 3 n yiseggasen, ma d tuddar ara yeṭṭfen amḍiq wis 7 akked wis 8, sɛant lḥeqq ad kkint deg-s mi ɛeddan ɛamayen. Ma ɣef tfelwit n uktazal, swayes txeddem teseqqamut n uktazal, yettili-d usenqeḍ ɣef 100 tenqiḍin. 25 tneqiḍin, rzant iberdan n taddart, 25 tneqiḍin-nniḍen n useddu n yiḍuman d wammus, ma d imeḍqan uzyizen (publique), yecban tajmaɛt, imekwan n tizzegzewt…atg ɣef 20 tneqiḍin, 10 tneqiḍin-tiyaḍ i tliwa d yiɣbula n waman. Ma d imeḍqan n yidles d tmussni akked yisebdaden ɣef 10 tneqiḍin, timqebrin s 7 tneqiḍin, ma d tlata-nni i d-yeqqimen i leqwanen n useḥbiber ɣef twennaḍt. Ad d-nesmeki, belli timsizzelt-agi n taddart tazedgant, yettheggi-tt-id yal aseggas Useqqamu aɣerfan n lwilaya (APW) n Tizi Uzzu, ma d iswi-ines d acebbeḥ d usizdeg n tuddar n Leqbayel. D asebɣes dɣa i tuddar i d-yettifriren di yal tazrigt, yerna tura tuɣal d ansay, ttemɛnadent tudrin fell-as. Ɣer taggara maḍi, ad d-nesmekti belli tazrigt n useggas yezrin, d taddart n Tiferdoud i yewwin arraz amezwaru, ma d tinna uqbel-is d taddart n Boumessoud i tt-yewwin d tamezwarut deg 2016.
Ghani Amazigh