Ulamma llan inmaluyen (syndicats) i yessutren asewxer n wass n tuɣalin s aɣerbaz, ladɣa deg lwilayt iḥuza waṭṭan n Choléra, maca taneɣlaft n usegmi teṭṭef di rray-is.
Seldazekka n larebɛa, 5 deg waggur-agi n cutember ara d-yili unekcum s aɣerbaz i lmend n useggas aɣurbiz 2018-2018. Yetturaǧu, d imelyan n yinelmaden ara irefden iqerban-nsen i wakken ad uɣalen ɣer uɣerbaz deg lwilaya n Tizi Uzzu. Mebɛed ugar n tlata wagguren n yimuras, ad uɣalen yinelmaden tineɣriyin-nsen, deg kraḍ n yiswiren n usegmi yemxalafen (aɣerbaz amenzu, aɣerbaz alemmas akked tesnawit). Ad yili uqbal n yinelmaden-agi sɣur 923 n yiɣerbazen yellan deg wakal n lwilaya n Tizi Uzzu, gar-asen 20 n yiɣerbazen d imayuten, ara yellin tiwurra-nsen deg wussan-agi kan sdat-nneɣ, ɣer tama n 903 n yiɣerbazen-nni yellan yakan. I useggas-agi aɣurbiz amaynut 2018-2019, iberreḥ unemhal n tenmehla n usegmi n Tizi Uzzu, Mass Lalaoui Ahmed s tulya n 20 n yisɣuren imaynuten. Gar-asen 5 d igrawen iɣurbizen (groupes scolaires), 5 d iɣerbazen imenza, 6 n yiɣerbazen ilemmasen (i yettwaṣegmen) akked tlata n tesnawiyin. Am wakken daɣen ara d-tili tulya n 11 n tnawalin tiɣurbizin (cantines) timaynutin, ara yebdun axeddim si ddurt i d-iteddun. I wakken ur d-tettili ara tačart n tzeɣwa n tɣuri deg yiɣerbazen imenza, yenna-d belli 11 n yigrawen iɣurbizen wejden i tuɣalin-agi n seldazekka, mazal 33 n yiɣerbazen imenza akked yigrawen iɣurbizen xeddmen deg-sen. Ha-ta-n wamek bḍan yisɣuren-agi iɣurbizen: Setta n yigrawen iɣurbizen n Oued Fali, Adrar, Makouda, Illoula Oumalou, Amzizou, M’Kira akked Frikat. Ma deg wayen yerzan aṣeggem n yiɣerbazen ilemmasen, yenna-d Mass Lalaoui Ahmed: “Akka tura nsewjed setta i tuɣalin-agi n useggas-a, ttɣaman-aɣ-d 17 ɣef 23 i yettwajerden”. Iɣerbazen-agi ilemmasen d wigi n tamiwin-agi: Azeffoun, Beni Zikki, Abizar, Aït Chafaâ, Sidi Naâmane akked Akerrou. Ttwaheggant daɣen tlata n tesnawiyin-agi: Tin n Oued Fali, tin n Imssouhel akked tin n Illoula Oumalou.
Ugar n 9 n yimelyan n yinelmaden ara yuɣalen deg wakal aɣelnaw
Ugar 9 n yimelyan n yinelmaden ara yuɣalen s aɣerbaz deg wakal n tmurt i useggas-agi aɣurbiz amaynut, i yettwaferqen ɣef 27 351 n yiɣerbazen yellan deg tmurt, ɣer tama n tzeɣwa n usegmi i yettwaheggan ad ilint di ttiɛad, i uqabel n wugur n tačart n tesmilin n tɣuri. Ulamma yennerna s waṭas wuṭṭun n yiɣerbazen, imi deg useggas iɛeddan ala 26 964, maca aseggas-a yella-d ureqqeɛ d tmerna n wazal n 387 n yiɣerbazen imaynuten, ara yellin tiwwura-nsen larebɛa-agi sdat-nneɣ, i d-yefkan leḥsab n 27 351 n yiɣerbazen. Tberreḥ-d tneɣlaft n usegmi aɣelnaw Massa Benɣebriṭ, deg temlilit-is d yinemhalen n 50 n tmehliwin n usegmi yellan di tmurt, belli yetturaǧǧu ad uɣalen wazal n 9 269 892 n yinelmaden ɣer tzeɣwa n tɣuri seg wass n larebɛa d tasawent. Ifimeḍ (%) ameqqran, ad yili deg uɣerbaz amenzu, i yulin aseggas-a ɣer 48,8 %, ma d ifimeḍ i d-yeqqimen yettwafraq ɣef uswir alemmas, win tesnawit akked win n uheggi. Ad tili temsirt tamezwarut seg yiwen n uɣerbaz n lwilaya n Mɛesker, s usentel n “ I wakken ad nerr tudert deg talwit d amenzay n usegmi”. Syina ara d-tefk tneɣlaft n usegmi aɣelnaw Massa Benghabrit tamsirt tamezwarut n useggas-agi aɣurbiz 2018-2019.
“I wakken ad yili useggas deg tegnatin igerrzen”
Maca uqbel annect-a, yuɣ lḥal anekcum yixeddamen n tedbelt tamatut (administation centrale), yella-d ass-nni n lḥed 19 deg waggur-agi n ɣuct iɛeddan. Ma d iselmaden, yuɣ lḥal uɣalen iḍelli n lḥed 2 deg cutember. Ma yella d afraq n yidlisenfusen (manuels), ilaq ad yekfu seld 10 tuber 2018. Am wakken daɣen i d-yella usileɣ n yiselmaden n uɣerbaz amenzu imaynuten, i d-yufraren deg temsizzelt n usegmi, i d-yellan deg wussan iɛeddan. Tallit n usileɣ-nsen sɣur imaswaḍen, tella-d seg 25 yulyu armi 7 ɣuct iɛeddan, i wakken ad bdun aseggas aɣurbiz amaynut akken i wata lḥal. Annect-agi i merra, i wakken ad yili unekcum aɣurbiz n useggas-agi deg tegnatin igerrzen.
Aselmed n tmaziɣt deg 48 n lwilayat
I lmend n unekcum aɣurbiz 2018-2019, yetturaǧu ad yili uselmed n tutlayt n tamaziɣt deg 48 n lwilayat n tmurt, deg uswir amenzu. Deg useggas aɣurbiz iɛeddan, ala 38 n lwilayt i tt-yesɣarayen, maca aseggas ad kemmlent 10 tiyaḍ. D ayen s wayes i d-iberreḥ umaray amatu n Useqqamu unnig n timuzɣa, Mass Si Lhacmi Assad, i d-yennan belli: “ Ad yili uselmed n tmaziɣt deg uswir amenzu deg 48 n lwilayat n tmurt”. I wakken, ad yili wannect-agi, yella-d yakan uheggi 300 n yiselmaden imaynuten ara yesseddun timsirin deg yiɣerbazen.Ɣer taggara, ad nesmekti kan s wugur n unekcum-agi aɣurbiz. D ugur n tačart n tneɣriyin n leqraya s yinelmaden, i d-yettuɣalen yal aseggas. Ugur-agi agejdan deg unnar n uselmed, yettḥaz ddeqs n lwilayat n tmurt, imi yella wanida yettaweḍ leḥsab n yinelmaden ɣer wugar n 40 deg yiwet n tneɣrit, ladɣa deg yiseggasen imenza n uswir amenzu.
Adaoun Abdelghani