Seg yizerfan imezwura i sεan warrac, d win n tɣuri. Meεna, ma nemmeslay-d ɣef uzref-agi, ilaq ad d-nesseddu daɣen ayen i as-ilaqen neɣ ayen i t-yettabaεen. Asaḍuf n tɣuri yeqqar-d: ‘’Yal aqcic yesεa azref ad iɣeṛ, yerna di tegnatin yelhan, am umḍiq iwulmen, lmakla ilaqen, akked tɣellist ( sécurité )’’. Acu kan, ur yelli wanect-agi deg uɣerbaz amenzu Ḥakem Laεyaci deg Ifra, di tɣiwant n Xerrata, ladɣa ayen icudden ɣer tɣellist. Imi leḥyud-is ceqqen, yerna seg teswiεt ɣer tayeḍ, zemren ad d-ɣlin. Ibabaten n warrac, ikcem-iten lḥir d tugdi ɣef tudert n warraw-nsen. Ladɣa imi d ccetwa i d-iteddun. «Amek ara ceggεeɣ mmi s ufus-iw ɣer yimi n tlafsa? ulac laman, yezmer ad d-yegrireb uɣerbaz-a ɣef warrac-nneɣ, yerna leḥyuḍ-is ur ttqabalen ara aṣemmiḍ». I d-yenna yiwen n ubabat. Ma yella d imeẓdaɣ n temnaḍt-agi nnan-d d akken aɣbel ur yelli ara d amaynut. Ɣef usentel-a, yerna-d yiwen: « Neεya deg ucekti, yiwen ur d-yesli i taɣuct-nneɣ. Akken nexdem neεweq: ma yella neṭṭef lwacul-nneɣ, ad asen-truḥ leqraya; ma yella nceyyeε-iten d amahi fell-asen ». Ma yella d aselway n tɣiwant yerra-asen, akken i d-tewwi teɣbalut-nneɣ: «Tamsalt-agi ɣur-s mraw n yiseggasen. Deg useggas n 2018, aselway aqbuṛ n tɣiwant n Xerrata yessaweḍ aɣbel-agi ama i uselway n twilayt, ama i unemhal n usegmi n Bgayet. Lwali, yefka-asen-d awal belli ad yedhu deg-s deg useggas i d-iteddun 2019. Yerna iceyyeε-d wid i iwalan liḥala deg wacu yella uɣerbaz-agi ass n 26 ɣuct yezrin». Seld isalli-a, theddnen yimezdaɣ n taddart i yellan ttidiren di tteqlaq ameqqran.
K. K.