Tettheggi-d Tdukkla Axxam Amaziɣ n Saint Denis sin n ttiɛadad ara yili d tajmilt i umeɣnas Nur At Ɛmara d tmarut Kaysa Xalifi.
Yetturaǧu ad mmaggen warmuden-a ass n sed 15 cutember n sdat-neɣ, deg tɣiwant n Saint Denis, tamurt n Fransa. Asihar amezwaru d tazabut tameqqrant, d tajmilt i Nur, ara d-yettwaheggin ass-nni n 15 cutember, seg 14h armi d 15h30 n tmeddit. Kra n win i iḥulfan terza-t taluft, yezmer ad yekki deg umsizwer-a n tira, s uceggeɛ n yizen i tansa taliktrunant n tddukkla: [email protected]. Ɣer taggara, ad yili warraz i win i d-yufraren d axelles n usikel ɣer tmurt n leqbayel deg tmesrafagt.Ttiɛad-nniḍen ara d-yilin daɣen, d asuddes n usmel n udlis seg tsebḥit n wass n ssebt i d-iteddun armi d 19:00 n tmeddit. Ɣef wawal n yimheggiyen-is, bɣan ad budden taẓrigt-a i tmarut Kaysa Xalifi, i aɣ-yeǧǧan ass n 25 yunyu yezrin. Nnig waya, i wugar n telɣut, iqeddicen akk i yeṭṭafen asmel-a, ad d-ḍrun deg usensu Hotel de ville n Saint Denis. «Nettheggi i wussan n tutlayt akken ad nerr azal i tutlayt-nneɣ, i wakken ad tecbu tutlayin-nniden, i wakken ad fehmen Yimaziɣen -Iqbayliyen d akken di tallit-a, tutlayt ur nettwaru ara leqrar-is d nnger», i d-tenna tselwayt n tddukkla-a timheggit, taǧǧalt n Nur At Ɛmara, Massa Samiya At Salem At Ɛmara. Terna-d daɣen: « Ad nerr deg-s tajmilt i Nur yellan iqeddec akken ad yesken i yal yiwet d yal yiwen d akken tutlat ilaq ad tettwaru. Daɣen d tajmilt i Kaysa d tasuta-nniḍen i yuran, i yerran azal d leqder i tutlayt-nneɣ. Ilaq wa ad tt-id-yettaǧǧa i wa akken ur tettmettat ara».
M. K.