Tuɣal-d aseggas-agi lxedma n yigelman deg tmurt n Lezzayer, mebɛed mi teḥbes acḥal-aya. Walan yimussnawen n tdamsa lecɣal-a, d abaɣur i tdamsa taɣelnawt, ara yefrun ugur n yigelman (cuirs). D annect-agi, i yeǧǧan, dɣa, awanek n tmurt n Lezzayer, ad yexdem ticemlit n ujmeɛ n yilmesyar n wakraren i imezlen ass-nni n lɛid tameqqrant. Ugar n 900 000 n yigelman n yizamaren i d-yettwajemɛen deg setta n lwilayat n tmurt ideg i d-yella ulqaḍ-nsen. Am wakken i t-id-yefka Unemhal amatu n tegrawt tanagdudt n lkettan akked uglim (Getex), Mass Mokrane Zerrouki, deg uktazal n temhelt-agi tamezwarut, yenna-d : « Nessaweḍ ad d-nejmeɛ ugar n 900 000 n yigelman n yizamaren i d-yellan deg setta n lwilayat-agi : Lezzayer tamanaɣt, Wehran, Qsenṭina, Ǧiǧel, Sṭif akked Tbatent. D agemmuḍ yelhan ideg temzelt-agi tamezwarut n usegrew n yigelman n yikerriyen, i d-yellan ass-nni n tizli n lɛid-agi tameqqrant iɛeddan ». Am wakken daɣen yetturaǧu deg useggas i d-iteddun ad yili ujmeɛ deg waṭas n lwilayat, dayen ara yessalin ula deg wuṭṭun n yigelman-agi. Ikemmel yenna-d : «Tamzelt tis snat n usegrew n yigelman n yikraren, ad ten-nesmatu seg lɛid tameqqran i d-iteddun deg wakal n tmurt merra, aya ad aɣ-yessiweḍ s asegrew n yakk ilemsiren n yizamaren ara yemmezlen. Ad nessiweḍ ɣer 4,5 ar 5 n yimelyunen n yilmesyar ara d-nessegrew, imi yal aseggas azal n xemsa n yimelyan n yixfawen n yizamaren i zellun Yizzayriyen».
Gh. A.