Am yal tikkelt, deg wass n tɛacurt, tettheggi-d teseqqamut n taddart Tagemmunt Ukerruc asfugel n tɛacurt. Yettili-d usiher-a deg umekkan iwumi qqaren Iɣil Ɛisi.
Aṭas n yimdanen i d-irezzun ɣer din i wakken ad d-ẓuren, ɣef wakken i aɣ-d-nnan kra, 40 n sellaḥ i swayes yettwassen umekkan-nni. Ma i wiyiḍ, tirza-nsen, tcudd ugar ɣer tmerrit akked tukksa n lxiq imi d ass n ustaɛfu yettwaxelsen. Akken yebɣu yili lmeqsud neɣ iswi n umdan, timililit deg Yiɣil Ɛisi deg wass n tɛacurt, d ass yemgaraden ɣef wussan-nniḍen : D ass n lferḥ akked unecreḥ ; d ass ideg tettemlili tassa d way turew imi aṭas n yimawlan i d-yettemyagaren gar-asen din ass-nni n tɛacurt. ‘’Yal aseggas, nesfugul taɛacurt akked lmulud dagi ɣur-neɣ. Ttɛedint deg tegnatin lɛali. Deg tegnatin n lferḥ, n temliliyin n yimdanen i d-yettasen seg yal tamnaḍt n tmurt n leqbayel, neɣ ɛad n tmurt n Lezzayer. Aṭas, diɣ, i d-yettuɣalen yal aseggas : Uɣalen d imezgan imi i ten-iɛeǧǧeb lḥal seg wayen iḍerrun dagi. Tella talwit, tella tukksa n lxiq, daymi i ṭṭuqtent twaculin i d-yettruḥun’’. Akka i aɣ-d-yenna Nadour M’hamed i yettmeslayen s yisem n teseqqamut n taddart Tagemmunt Ukerruc. Zyada ɣef zzyara, tella lwaɛda i wid i d-yerzan ɣer din. Yettwahegga-d seksu s uksum i qeccuc, meccuc. Lwaɛda i ssufuɣen d ’’asfel ɣef rebɛin n ssellaḥ n Yiɣil Ɛisi’’, i d-nnan. ‘’Tameɣra-agi, tettili-d d ansay u d tisirit i wakken ad tesdum aktayen-nneɣ, gar-asen tiwizi i yebdan ad neger deg tmetti taqbaylit’’, ikemmel yenna-d yimḍebber n taddart Tagemmunt Ukerruc. Xas ulamma yettili-d umgarad gar zik akked tura deg wayen yeɛnan asfugel n tɛacurt, meɛna azalen i icudden ɣer usiher-a, yeqqim d netta. Aya, ad t-naf deg temsalt-nni n unejmuɛ n yidrimen neɣ n tɣawsiwin-nniḍen iwumi qqaren Agraw. Akka, dɣa, i d-yella ass-nni n tɛacurt deg Yiɣil Ɛisi. Deg tlemmast n yiwet n texxamt, ḍewren-d d agraw ccix n lǧamaɛ akked kra n lɛeqqal n taddart, tessa-d tgertilt ɣef lqaɛa, s ufella-s amendil uɣur srusuyen ayen ttseddiqen yimdanen n yidrimen. Amur ameqqran n yibabaten ttmuddun idrimen i warraw-nsen i wakken d nutni ara ten-iseddqen. Syin, mi ssersen yigerdan ssadaqa-nsen, ad asen-d-ffken yimɣaren-nni tiḥlawatin. Acu kan, ayen yeṭṭfen lhelha-nneɣ deg Yiɣil Ɛisi d akken ulac la taqubbet neɣ aẓekka din. Mi nesteqsa, nnan-d ulac later n sellaḥ-agi dagi. Xeddmen kan asfugel dagi d tajmilt i 40 n sellaḥ n Yiɣil Ɛisi.
Hocine Moula